दसैं, तिहार र छठ पर्वलाई लक्षित गर्दै मधेश प्रदेश प्रहरीले आठवटै जिल्लामा विशेष सुरक्षा योजना लागू गरेको छ। चाडपर्वका बेला बढ्ने भीडभाड, सवारी आवागमन, सीमा गतिविधि तथा सम्भावित आपराधिक घटनालाई ध्यानमा राख्दै प्रदेशभर ७ हजार २२९ प्रहरी परिचालन गरिने भएको हो ।
मधेश प्रदेश प्रहरी कार्यालय जनकपुरका प्रवक्ता एसपी प्रभुप्रसाद ढकालका अनुसार असोज २९ गतेदेखि कात्तिक ३० गतेसम्म विशेष सुरक्षा योजना सञ्चालन हुनेछ। जिल्लागत रूपमा सबैभन्दा बढी धनुषामा १ हजार ५९९ प्रहरी परिचालन गरिनेछ ।
यस्तै, बारामा ८७०, रौतहटमा ८६३, सप्तरीमा ८५७, सर्लाहीमा ७९२, महोत्तरीमा ७४७, पर्सामा ६६१ र सिरहामा ६५१ प्रहरी परिचालन हुनेछन् ।
सुरक्षा योजनाअन्तर्गत १ हजार १२४ वटा ड्युटीमा ५ हजार ४८१ प्रहरी परिचालन गरिनेछ। यसका लागि १४ जिल्ला रिजर्भ, ९२ क्विक रेस्पोन्स टिम (क्यूआरटी), १८ स्ट्राइकिङ टोली, ८७ ट्राफिकसहितको चेकिङ, ८६ मोबाइल गस्ती र १८० पैदल गस्ती परिचालन हुनेछन् ।
त्यसैगरी शंकास्पद स्थानमा निगरानीका लागि ३३९ पिकेट, राजमार्गमा २९ स्कर्टिङ र यात्रुको सहजताका लागि ६४ यात्रु सहायता कक्ष सञ्चालन गरिने प्रहरीले जनाएको छ ।
भारत–नेपाल सीमा क्षेत्रमा चोरी तथा तस्करी नियन्त्रणका लागि ७३ ड्युटी परिचालन गरिनेछ। धार्मिक तथा पर्यटकीय स्थलको सुरक्षाका लागि ३७, बजार अनुगमनका लागि २१ तथा कर्डन र सर्च अभियानका लागि १८ ड्युटी तोकिएको छ ।
सभा, जुलुस तथा धर्नाका क्रममा आकस्मिक सुरक्षा व्यवस्थापनका लागि १६ र विपद् प्रतिकार्यका लागि २२ टोली परिचालन हुनेछन्। सीमा नाकामा यात्रु तथा नागरिकलाई आवश्यक सूचना र सहयोग उपलब्ध गराउन २८ वटा हेल्प डेस्कसमेत सञ्चालन गरिनेछ ।
चाडपर्वका बेला नेपाल–भारत सीमा नाकामा आवतजावत बढ्ने भएकाले तस्करी तथा अवैध सामान ओसारपसार नियन्त्रणलाई प्रहरीले प्राथमिकतामा राखेको छ। धार्मिक स्थलमा हुने भीडभाडमा चोरी, लुटपाट तथा मानिस हराउने घटना रोक्न पनि सुरक्षा निगरानी बढाइनेछ ।
छठ पर्वका क्रममा घाटमा डुब्ने तथा भीडजन्य दुर्घटना हुनसक्ने जोखिमलाई ध्यानमा राख्दै सुरक्षा टोली परिचालन गरिनेछ। दसैंमा घर फर्किने यात्रु र तिहारपछि बढ्ने आवागमनका कारण हुनसक्ने सडक दुर्घटना तथा ट्राफिक जाम नियन्त्रणका लागि समेत विशेष व्यवस्था गरिएको प्रहरीले जनाएको छ ।
प्रहरीले पटका तथा आतिसबाजीबाट हुनसक्ने आगलागी, जुवा–तास तथा सट्टेबाजी, मादक पदार्थ सेवनबाट हुने झैझगडा, घरेलु हिंसा, पाकेटमारी, चोरी तथा लुटपाटमा निगरानी बढाउने भएको छ ।
त्यसैगरी बैंक तथा वित्तीय संस्था, सुनचाँदी पसल र नगद कारोबार हुने स्थानमा हुनसक्ने चोरी तथा डकैती, देउसी–भैलो र सांस्कृतिक कार्यक्रमका कारण रात्रीकालीन सुरक्षामा आउनसक्ने चुनौतीलाई पनि सुरक्षा योजनामा समेटिएको छ ।
महिला, बालबालिका तथा ज्येष्ठ नागरिकको सुरक्षा, अवैध मदिरा तथा लागुऔषध कारोबार, कालोबजारी, कृत्रिम अभाव र मूल्यवृद्धि नियन्त्रणमा समेत प्रहरीले निगरानी बढाउने जनाएको छ। सामाजिक सञ्जालमार्फत गलत सूचना फैलाएर सामाजिक तनाव सिर्जना गर्ने गतिविधि तथा आगलागी, विद्युत् सर्टलगायतका आकस्मिक विपद्लाई पनि सुरक्षा चुनौतीका रूपमा पहिचान गरिएको छ ।
प्रवक्ता ढकालका अनुसार आवश्यकताअनुसार थप जनशक्तिलाई कमान्ड पोस्ट, संयुक्त गस्ती, सादा पोसाकमा सूचना संकलन तथा आकस्मिक ड्युटीमा परिचालन गरिनेछ ।
