अदालतबाट विभिन्न मुद्दामा दोषी ठहर भई लामो समयदेखि फरार रहेका ३७ जना प्रतिवादीलाई प्रहरीले रौतहटबाट पक्राउ गरेको छ । फैसला कार्यान्वयन विशेष अभियानअन्तर्गत जिल्ला प्रहरी कार्यालय र मातहतका प्रहरी इकाइबाट परिचालित टोलीले उनीहरूलाई पक्राउ गरेको हो ।
प्रहरीका अनुसार पक्राउ परेकाहरूबाट कुल सात वर्ष दुई महिना २७ दिन कैद सजाय तथा दुई लाख ७३ हजार ७७७ रुपैयाँ जरिवाना असुल गर्न बाँकी रहेको थियो ।
जिल्ला प्रहरी कार्यालय रौतहटका प्रवक्ता एवं प्रहरी नायब उपरीक्षक वसन्त गौतमका अनुसार पक्राउ परेकाहरू विभिन्न प्रकृतिका मुद्दामा अदालतबाट दोषी ठहर भएका व्यक्ति हुन् ।
उनीहरूमाथि जालसाजी, कुटपिट तथा अङ्गभङ्ग, विद्युतीय कारोबार ऐन, नागरिकता कीर्ते, ज्यान मार्ने उद्योग, अभद्र व्यवहार, लेनदेन बिगो, बालशोषण, जबर्जस्ती करणी तथा जबर्जस्ती करणी उद्योग र चेक अनादरलगायतका मुद्दा रहेको प्रहरीले जनाएको छ ।
प्रहरीले सञ्चालन गरेको १० दिने विशेष अभियानका क्रममा उनीहरूलाई पक्राउ गरिएको हो। पक्राउ परेका सबैलाई आवश्यक कानुनी प्रक्रिया तथा कैद र जरिवाना असुलीका लागि रौतहट जिल्ला अदालत, गौरमा बुझाइएको डीएसपी गौतमले जानकारी दिए ।
प्रहरीले अदालतबाट फैसला भइसकेपछि पनि फरार रहेका प्रतिवादीको खोजी तथा पक्राउलाई तीव्र बनाएको जनाएको छ ।
