मधेस प्रदेश प्रहरीले ६९औँ प्रहरी दिवसको अवसरमा जनचेतनामूलक टिकटक भिडियो प्रतियोगिता आयोजना गर्ने भएको छ ।
मधेस प्रदेश प्रहरीले लागुऔषध दुर्व्यसन, सामाजिक सञ्जालको दुरुपयोग र घरेलु हिंसालगायतका विषयमा जनचेतना फैलाउने उद्देश्यले प्रतियोगिता आयोजना गर्न लागेको हो । पर्साका प्रहरी उपरीक्षक (एसपी) पवन भट्टराईका अनुसार प्रतियोगितामा ‘लागुऔषध दुर्व्यसनबाट बचौँ र बचाऔँ’, ‘सामाजिक सञ्जालको दुरुपयोग नगरौँ, सभ्य नागरिक बनौँ’, ‘घरेलु हिंसा अन्त्य गरौँ तथा परिवारमा मेलमिलाप कायम राखौँ’ लगायतका विषय समेटिएका छन् ।
प्रतियोगितामा सहभागी हुन इच्छुकले ३० सेकेन्डदेखि बढीमा १ मिनेटसम्मको सन्देशमूलक टिकटक भिडियो तयार गरी पठाउनुपर्नेछ । तयार गरिएको भिडियोमा प्रतियोगिताका लागि तोकिएका विषयलाई अनिवार्य रूपमा समेट्नुपर्ने प्रहरीले जनाएको छ ।
प्रतियोगितामा सहभागी हुन तयार गरिएको भिडियो असोज २७ गते राति १२ बजेसम्म मधेस प्रदेश प्रहरी कार्यालयले उपलब्ध गराएको ह्वाट्सएप नम्बरमा पठाउनुपर्नेछ । प्रहरीले भिडियो पठाउन ९७०५४६४१०० र ९८५१२९५७८६ नम्बर उपलब्ध गराएको छ ।
तोकिएको समयपछि प्राप्त हुने भिडियो प्रतियोगितामा समावेश नगरिने प्रहरीले स्पष्ट पारेको छ । सहभागीले पठाएको भिडियो प्रतियोगितामा प्रयोग गर्न मिल्ने गरी तयार गर्नुपर्ने पनि प्रहरीले जनाएको छ । मधेस प्रदेश प्रहरी कार्यालयले प्रतियोगितामार्फत लागुऔषध दुर्व्यसन, सामाजिक सञ्जालको दुरुपयोग तथा घरेलु हिंसाविरुद्ध जनचेतना अभिवृद्धि गर्ने उद्देश्य राखेको जनाएको छ।
प्रतियोगितामा उत्कृष्ट हुने सहभागीलाई प्रशंसापत्र प्रदान गरी सम्मान गरिने मधेस प्रदेश प्रहरीले जनाएको छ।
भिडियाे रिपाेर्ट
