बाराको सिम्रौनगढ नगरपालिका–९, बसवरियास्थित नहर सडकखण्डमा मोटरसाइकलले साइकललाई ठक्कर दिँदा एक महिलाको मृत्यु भएको छ भने तीन जना घाइते भएका छन् ।
मृत्यु हुनेमा सिम्रौनगढ नगरपालिका–६ निवासी ३७ वर्षीया रिजवना खातुन रहेकी छन् ।
जिल्ला प्रहरी कार्यालय बाराका अनुसार शनिबार साँझ भएको दुर्घटनामा साइकलमा सवार रिजवना र उनका श्रीमान् ४० वर्षीय सबु मोहम्द तथा मोटरसाइकल चालक २५ वर्षीय अजय महतो र मोटरसाइकलमा पछाडि सवार २२ वर्षीय विवेक महतो घाइते भएका थिए ।
घाइते रिजवनाको उपचारका क्रममा प्रादेशिक अस्पताल कलैयामा साँझ करिब ७ः१० बजे मृत्यु भएको जिल्ला प्रहरी कार्यालय बाराका निमित्त सूचना अधिकारी तथा प्रहरी निरीक्षक विमल खतिवडाले जानकारी दिए ।प्रहरीका अनुसार सिम्रौनगढबाट कचोर्वातर्फ जाँदै गरेको बीआर ०५ एएफ ०१४० नम्बरको मोटरसाइकलले सोही दिशातर्फ गइरहेको साइकललाई ठक्कर दिएको थियो ।
दुर्घटनाबारे थप अनुसन्धान भइरहेको प्रहरीले जनाएको छ ।
