बाराको अमलेखगञ्जमा पिकअप गाडीको ठक्करबाट एक वृद्धको मृत्यु भएको छ । दुर्घटनापछि फरार भएका चालकलाई प्रहरीले मकवानपुरको रातेमाटो चेकपोस्टबाट नियन्त्रणमा लिएको छ ।
मृत्यु हुनेमा जीतपुरसिमरा उपमहानगरपालिका–२२ निवासी करिब ६७ वर्षीय रामबहादुर थिङ रहेका छन् । आइतबार बिहान पथलैयाबाट हेटौंडातर्फ जाँदै गरेको प्र २–०३–००१ च १७७७ नम्बरको पिकअपले उनलाई ठक्कर दिएको थियो । ठक्करबाट थिङको घटनास्थलमै मृत्यु भएको हो । उनको शव वीरगन्जस्थित नारायणी अस्पतालमा राखिएको छ ।
दुर्घटनापछि फरार भएका पिकअप चालक महोत्तरीको बर्दिबास नगरपालिका–१४ निवासी ३४ वर्षीय विजयकुमार साह सोनारलाई प्रहरीले नियन्त्रणमा लिएको हो ।
इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्टको नेतृत्वमा खटिएको प्रहरी टोलीले ठक्कर दिने गाडीको पहिचान गरी चालकसहित नियन्त्रणमा लिन सफल भएको जनाइएको छ ।
दुर्घटनापछि फरार गाडी पत्ता लगाउन माग गर्दै स्थानीयले अमलेखगञ्जमा सडक अवरुद्ध गरेका थिए । स्थानीयको अवरोधका कारण बिहानैदेखि पथलैया–हेटौंडा सडकखण्डमा यातायात प्रभावित भएको थियो ।
प्रहरीले ठक्कर दिने गाडी र चालकलाई नियन्त्रणमा लिएपछि सडक सञ्चालनमा आएको छ ।
घटनाबारे थप अनुसन्धान भइरहेको प्रहरीले जनाएको छ ।
