सामाजिक सञ्जाल फेसबुकमा खुकुरी देखाएर डरत्रास फैलाउने किसिमको तस्बिर राखेको आरोपमा धनुषा प्रहरीले एक युवकलाई नियन्त्रणमा लिएको छ ।
प्रहरीका अनुसार पक्राउ पर्नेमा जनकपुरधाम उपमहानगरपालिका–१३, धाताटोलका १८ वर्षीय सुमन पटेल रहेका छन्। उनलाई आइतबार साँझ आफ्नै घरबाट नियन्त्रणमा लिइएको जिल्ला प्रहरी कार्यालय धनुषाले जनाएको छ ।
जिल्ला प्रहरी कार्यालयका प्रहरी प्रवक्ता एवं प्रहरी नायब उपरीक्षक (डीएसपी) ओमप्रकाश खनालका अनुसार पटेलले फेसबुकमा धारिलो हतियार खुकुरी देखाउँदै डरत्रास फैलाउने प्रकृतिको तस्बिर अपलोड गरेका थिए ।
उक्त घटनाबारे प्रहरीले अनुसन्धान अघि बढाएको छ। नियन्त्रणमा लिइएका पटेलमाथि प्रचलित कानुनअनुसार आवश्यक कारबाही प्रक्रिया अघि बढाइएको जिल्ला प्रहरी कार्यालय धनुषाले जनाएको छ ।
प्रहरीले सामाजिक सञ्जालको प्रयोग गर्दा अरूमा डरत्रास सिर्जना गर्ने वा कानुनविपरीत हुने गतिविधिबाट बच्न आग्रह गरेको छ ।
