नेपाल वायुसेवा निगम (नेपाल एयरलाइन्स)ले नेपाल र भारतबीच यात्रा गर्ने यात्रुहरूलाई निश्चित मोडलको पावर बैंक नबोक्न आग्रह गरेको छ ।
निगमका अनुसार भारतको नागरिक उड्डयन महानिर्देशनालय (डीजीसीए) को सर्कुलरअनुसार MOBIKING MK-PB-04 मोडलको पावर बैंक भारतभित्र, भारतबाट र भारततर्फ सञ्चालन हुने सबै उडानमा प्रतिबन्धित गरिएको छ ।
यसै व्यवस्थालाई ध्यानमा राख्दै नेपालबाट भारत र भारतबाट नेपालतर्फ हवाई यात्रा गर्ने यात्रुहरूलाई उक्त मोडलको पावर बैंक साथमा नल्याउन तथा नलैजान नेपाल वायुसेवा निगमले आग्रह गरेको हो ।
केही दिनअघि भारतको राजधानी दिल्लीबाट चेन्नई जाँदै गरेको इन्डिगो एयरलाइन्सको विमानमा यात्रुको झोलामा रहेको पावर बैंक विस्फोट भएर आगलागी भएको थियो। उक्त घटनापछि विमानलाई भारतको हैदराबाद विमानस्थलमा आपत्कालीन अवतरण गराइएको थियो ।
यस घटनापछि विमानमा पावर बैंक तथा लिथियम ब्याट्रीको सुरक्षाबारे थप सतर्कता अपनाइएको छ। भारतको नागरिक उड्डयन महानिर्देशनालयका अनुसार पावर बैंक र अतिरिक्त लिथियम ब्याट्री हाते सामानमा मात्र राख्न पाइन्छ। साथै, उडानका क्रममा पावर बैंकबाट अन्य विद्युतीय उपकरण चार्ज नगर्न पनि डीजीसीएले सिफारिस गरेको छ ।
हवाई यात्राका क्रममा यात्रुले सम्बन्धित विमान कम्पनीका सुरक्षा नियम पालना गर्नुपर्ने हुन्छ। पावर बैंक बोक्नुअघि त्यसको मोडल र विमान कम्पनीले जारी गरेका निर्देशन जाँच गर्न यात्रुलाई आग्रह गरिएको छ ।
समरी: नेपाल वायुसेवा निगमले भारतको नागरिक उड्डयन महानिर्देशनालयको सर्कुलरअनुसार MOBIKING MK-PB-04 मोडलको पावर बैंक नेपाल–भारत उडानमा नबोक्न यात्रुलाई आग्रह गरेको छ। विमानमा पावर बैंक विस्फोट भएर आगलागी भएको घटनापछि हवाई सुरक्षामा सतर्कता बढाइएको हो ।
