प्रधानमन्त्री बालेन्द्र शाहको आसन्न भारत भ्रमणको तयारीका लागि काठमाडौं आएका भारतीय विदेश सचिव विक्रम मिश्रीले नेपालमा भेटघाट सुरु गरेका छन् । उनले काठमाडौं आएलगत्तै परराष्ट्रमन्त्री शिशिर खनालसँग शिष्टाचार भेट गरेका छन् ।
परराष्ट्र मन्त्रालयमा भएको भेटमा नेपाल–भारत सम्बन्धलाई थप सुदृढ बनाउने तथा द्विपक्षीय सहकार्य विस्तार गर्ने विषयमा छलफल भएको परराष्ट्रमन्त्री खनालको सचिवालयले जनाएको छ ।
मन्त्रालयका अनुसार भेटका क्रममा नेपाल र भारतबीचको बहुआयामिक साझेदारीलाई थप गहिरो बनाउने तथा दुई देशबीच रहिआएको ऐतिहासिक मैत्रीपूर्ण सम्बन्धलाई थप मजबुत बनाउने विषयमा कुराकानी भएको थियो ।
त्यसैगरी, दुई देशबीचको आपसी सम्बन्धका विविध पक्ष र द्विपक्षीय सहकार्यका क्षेत्रलाई थप विस्तार गर्ने विषयमा समेत छलफल भएको मन्त्रालयले जनाएको छ ।
प्रधानमन्त्री बालेन्द्र शाहको आसन्न भारत भ्रमणको तयारीका सिलसिलामा भारतीय विदेश सचिव मिश्री बुधबार बिहान काठमाडौं आइपुगेका हुन् । उनको भ्रमणलाई प्रधानमन्त्रीको भारत भ्रमणको तयारी र नेपाल–भारत कूटनीतिक सम्बन्धका दृष्टिले महत्त्वपूर्ण रूपमा हेरिएको छ ।
