३३ लाख रुपैयाँ घुस लिँदालिँदै पक्राउ परेका मध्यपुर थिमि नगरपालिकाका प्रमुख प्रशासकीय अधिकृत भोजराज घिमिरेले ठेक्का सम्झौताअनुसारको मोबिलाइजेसन फण्ड भुक्तानी तथा बाँकी काममा सहजीकरण गरिदिने आश्वासन दिएको पाइएको छ ।
अख्तियार दुरुपयोग अनुसन्धान आयोगका अनुसार घिमिरे र गुड नेबर्स इन्टरप्राइजेज प्रालि, कोटेश्वर काठमाडौंका सञ्चालक वरुण ढुङ्गेललाई सोमबार भक्तपुरको निकोसेराबाट पक्राउ गरिएको थियो ।
ठेक्का सम्झौताबमोजिम बाँकी किस्ता तथा मोबिलाइजेसन फण्डको भुक्तानी प्रक्रियामा सहजीकरण गरिदिने र अन्य बाँकी कामसमेत मिलाइदिने भन्दै सेवाग्राहीसँग घुस मागिएको सूचना तथा उजुरी आयोगमा परेको थियो ।
सोही उजुरीका आधारमा आयोगले निगरानी तथा अनुसन्धान अघि बढाएको थियो। त्यसक्रममा घिमिरे र ढुङ्गेललाई ३३ लाख रुपैयाँ घुससहित पक्राउ गरिएको अख्तियारले जनाएको छ ।
पक्राउ परेका दुवै जनालाई विशेष अदालतबाट म्याद थप गरी हिरासतमा राखेर अनुसन्धान अघि बढाइएको अख्तियारका प्रवक्ता सुरेश न्यौपानेले जानकारी दिएका छन् ।
