काठमाडौं । यमपञ्चकअन्तर्गत आज कुकुर तिहार विभिन्न कार्यक्रम गरी मनाइएको छ । यस अवसरमा बलम्बुस्थित सशस्त्र प्रहरी बल नेपालको पशु स्वास्थ्य तथा डग ह्यान्डलर उपशाखामा विशेष कार्यक्रम आयोजना गरी कुकुर तिहार मनाइएको हो ।
कार्यक्रममा सशस्त्र प्रहरी बलमा कार्यरत तालिमप्राप्त कुकुरहरूले अपराध अनुसन्धान, विस्फोटक पदार्थ तथा हातहतियार पहिचान, खोज तथा उद्धार र आधारभूत अनुशासनसम्बन्धी सीप प्रदर्शन गरेका थिए ।
प्रदर्शनका क्रममा सीमा क्षेत्रमा विस्फोटक पदार्थ तथा हातहतियार पहिचान गर्ने, अपराधमा संलग्न व्यक्तिको खोजी गर्ने तथा भूकम्प र अन्य प्राकृतिक विपद्का बेला भग्नावशेषमा पुरिएका मानिसको खोज तथा उद्धार गर्ने कुकुरहरूको क्षमता प्रस्तुत गरिएको थियो। साथै, कुकुरलाई प्रदान गरिने आधारभूत तालिम तथा अनुशासनसम्बन्धी अभ्याससमेत देखाइएको थियो ।
सशस्त्र प्रहरीका अनुसार तालिमप्राप्त कुकुरहरू सुरक्षा चुनौती तथा प्राकृतिक विपद्का बेला महत्वपूर्ण रूपमा परिचालन हुँदै आएका छन् । २०७२ सालको विनाशकारी भूकम्पदेखि पछिल्लो समय भोटेकोशी क्षेत्रमा आएको बाढीपहिरोजस्ता विपद्मा समेत कुकुरहरू खोज तथा उद्धार कार्यमा खटिएका थिए ।
भोटेकोशी क्षेत्रमा आएको विपद्का क्रममा तीनवटा तालिमप्राप्त कुकुर परिचालन गरी कठिन भौगोलिक अवस्था, हिलो तथा मानिस पुग्न कठिन स्थानमा खोजी गरिएको थियो। उक्त खोजी अभियानका क्रममा कुकुरहरूले २० वटा शव फेला पार्न सहयोग गरेको सशस्त्र प्रहरीले जनाएको छ ।
कार्यक्रमको अन्त्यमा तालिमप्राप्त कुकुरहरूको पूजा गरी टीका तथा माला लगाइदिनुका साथै मिठा खानेकुरा खुवाइएको थियो ।
मानिसको सुरक्षा, अपराध अनुसन्धान तथा प्राकृतिक विपद्का बेला खोज तथा उद्धारमा महत्वपूर्ण भूमिका निर्वाह गर्दै आएका कुकुरप्रति सम्मान र कृतज्ञता व्यक्त गर्दै सशस्त्र प्रहरीले कुकुर तिहार मनाएको हो ।
.jpg)
.jpg)
.jpg)
.jpg)
.jpg)
.jpg)
.jpg)
