काठमाडौँ । गृहमन्त्री सुधन गुरुङले चाडपर्वका नाममा हुने अश्लील तथा विकृत गतिविधि नियन्त्रण गर्न सरकार प्रतिबद्ध रहेको बताएका छन् ।
मंगलबार सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले मौलिक परम्परा र सांस्कृतिक मर्यादामा आँच आउने गरी देउसी–भैलो खेल्ने क्रममा हुने अमर्यादित गतिविधिलाई कानुनबमोजिम कडाइका साथ नियन्त्रण गरिने बताएका हुन् ।
गृहमन्त्री गुरुङले देउसी–भैलोजस्ता सांस्कृतिक परम्पराका नाममा अश्लीलता र विकृति फैलाउने गतिविधिप्रति गृह मन्त्रालय गम्भीर रहेको उल्लेख गरेका छन् ।
उनले यस्ता गतिविधि कहीँकतै देखिए तत्काल प्रहरीको १०० नम्बरमा खबर गर्न सर्वसाधारणलाई आग्रहसमेत गरेका छन्।
चाडपर्वको मौलिकता, सांस्कृतिक पहिचान र सामाजिक मर्यादा कायम राख्न सरकार प्रतिबद्ध रहेको उनको भनाइ छ।
