काठमाडौं । प्रधानमन्त्री बालेन्द्र शाह (बालेन) ले नेपाल संवत् ११४७ तथा म्हः पूजाको अवसरमा स्वदेश तथा विदेशमा रहेका सम्पूर्ण नेपालीलाई शुभकामना व्यक्त गरेका छन् ।
प्रधानमन्त्री शाहले मंगलबार सामाजिक सञ्जाल फेसबुकमार्फत शुभकामना सन्देश जारी गर्दै नेपाल संवत् नेपालको मौलिक समयचक्र र राष्ट्रिय पहिचान भएको बताएका छन् ।
राष्ट्रिय विभूति शङ्खधर साख्वाःले देशभरका जनतालाई ऋणमुक्त पारेर नेपाल संवत् सुरु गरेको स्मरण गर्दै उनले यो चन्द्रमामा आधारित मौलिक संवत् भएको उल्लेख गरेका छन् ।
म्हः पूजाको महत्त्वबारे चर्चा गर्दै प्रधानमन्त्री शाहले आफ्नै देह र शरीरभित्रको चेतनालाई साक्षी राखेर आफैँले आफैँलाई पूजा गर्ने परम्पराले आत्मशुद्धि र चेतनाको बोध गराउने बताएका छन् ।
उनका अनुसार म्हः पूजाले नेवार समुदायभित्र आपसी सद्भाव, आत्मबल र पुर्ख्यौली संस्कृतिको संरक्षण गर्दै जातीय एकतालाई थप प्रगाढ बनाउने काम गर्छ ।
त्यस्तै, गोवर्धन पूजा तथा हली तिहारको प्रसङ्ग उल्लेख गर्दै प्रधानमन्त्री शाहले कृषिकर्मका सहयात्री गोरुलाई पिठो, नुन र बावर खुवाउने तथा हलो, फालीलगायत कृषि औजारको पूजा गर्ने परम्पराको चर्चा गरेका छन् ।
भैलो र देउसीले छरछिमेकमा आपसी आत्मीयता र सद्भाव बढाउने उल्लेख गर्दै उनले मौलिक चाडपर्वले आपसी रिसराग भुलेर सामाजिक एकता र सहिष्णुताको भावना बलियो बनाउन प्रेरित गर्ने विश्वास व्यक्त गरेका छन् ।
प्रधानमन्त्री शाहले आफ्नो शुभकामना सन्देशको अन्त्यमा सबैको जीवनमा सुख, शान्ति, समृद्धि र उत्तरोत्तर प्रगतिको कामना गरेका छन् ।
