काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले वर्तमान सरकार पाँच वर्षसम्म टिकाउने प्रतिबद्धता व्यक्त गरेका छन् । आयोजित देउसी–भैलो कार्यक्रममा सहभागी हुँदै उनले देउसीको भाकामार्फत सरकारको स्थायित्वप्रति प्रतिबद्धता जनाएका हुन् ।
देउसी खेल्ने क्रममा लामिछानेले भने, ‘जान्नेले नजान्नेलाई सिकाउने, पाँच वर्ष यही सरकार टिकाउने ।’
देशमा पुनः आन्दोलन हुन सक्ने चर्चा भइरहेका बेला लामिछानेले आन्दोलनको अवस्था आउन नदिने संकेत गर्दै देउसीकै भाकामा सरकारप्रतिको आफ्नो धारणा व्यक्त गरे ।
उनले भने, ‘देशले अब आन्दोलन धान्दैन, परि आए यी खुट्टा चाहिँ काम्दैन ।’
देउसी–भैलो कार्यक्रममार्फत लामिछानेले तिहार तथा छठ पर्व मनाइरहेका स्वदेश तथा विदेशमा रहेका सम्पूर्ण नेपालीमा सुख, शान्ति, समृद्धि र उत्तरोत्तर प्रगतिको शुभकामनासमेत व्यक्त गरे ।
कार्यक्रममा सभापति लामिछानेसँगै उनकी पत्नी निकिता लामिछाने तथा परिवारका अन्य सदस्यहरूको पनि सहभागिता रहेको थियो ।
