मधेश प्रदेशसभाको बैठक शनिबारका लागि आह्वान गरिएको छ । मुख्यमन्त्री कृष्णप्रसाद यादवले प्रदेशसभाबाट विश्वासको मत लिने प्रयोजनका लागि शनिबार दिउँसो १ बजे बैठक बोलाइएको प्रदेशसभा सचिवालयले जनाएको छ ।
मधेश प्रदेश सरकारमा सहभागी नेकपा (एमाले) र नेपाली कम्युनिस्ट पार्टी (नेकपा) ले समर्थन फिर्ता लिएपछि मुख्यमन्त्री यादवले विश्वासको मत लिन लागेका हुन् । नेपाली कांग्रेसबाट निर्वाचित यादव नेतृत्वको सरकार अहिले अल्पमतमा परेको छ ।
सभामुख रामआशिष यादवका अनुसार प्रदेशसभा बैठक सञ्चालन गर्नुअघि शुक्रबार दिउँसो कार्यव्यवस्था परामर्श समितिको बैठक बस्नेछ। उक्त बैठकले शनिबारको प्रदेशसभा बैठकको कार्यसूची निर्धारण गर्नेछ ।
मुख्यमन्त्री यादवले विश्वासको मत लिने प्रयोजनका लागि बुधबार नै प्रदेशसभा सचिवालयलाई पत्राचार गरेका थिए । विश्वासको मत प्राप्त गर्न विभिन्न राजनीतिक दलसँग छलफल भइरहेको र अन्तिम समयसम्म पनि संवाद जारी रहने मुख्यमन्त्री यादवले बताएका छन् ।
कांग्रेस नेतृत्वको सरकारमा सहभागी एमालेका चार मन्त्रीले गत २५ असोजमा सामूहिक राजीनामा दिँदै सरकारलाई दिएको समर्थन फिर्ता लिएका थिए। त्यसैगरी, नेकपाका चार मन्त्रीले गत २० कात्तिकमा राजीनामा दिँदै समर्थन फिर्ता लिएका थिए ।
संवैधानिक व्यवस्थाअनुसार कुनै दलले सरकारलाई दिएको समर्थन फिर्ता लिएमा मुख्यमन्त्रीले ३० दिनभित्र प्रदेशसभाबाट विश्वासको मत लिनुपर्ने हुन्छ। एमालेले समर्थन फिर्ता लिएको ३० दिन शनिबार पूरा हुँदैछ । निर्धारित समयभित्र विश्वासको मत प्राप्त गर्न नसके मुख्यमन्त्री यादव स्वतः पदमुक्त हुनेछन् ।
विश्वासको मत सुनिश्चित हुन नसके मुख्यमन्त्री यादवले त्यसअघि नै राजीनामा दिएर नयाँ सरकार गठनका लागि बाटो खोल्न सक्ने सम्भावना पनि छ । त्यसैले शनिबारको प्रदेशसभा बैठक र मुख्यमन्त्री यादवको राजनीतिक भविष्यलाई चासोका साथ हेरिएको छ ।
दुई दलले समर्थन फिर्ता लिएपछि मुख्यमन्त्री यादव सरकार जोगाउने प्रयासमा सक्रिय भएका छन् । यता एमाले र नेकपा भने जनता समाजवादी पार्टी (जसपा) नेपालको नेतृत्वमा नयाँ सरकार गठन गर्ने कसरतमा जुटेका छन् ।
१०७ सदस्यीय मधेश प्रदेशसभामा सरकार गठनका लागि कम्तीमा ५४ सांसदको समर्थन आवश्यक पर्छ। प्रदेशसभामा नेपाली कांग्रेसका २२, एमालेका २३, जसपा नेपालका २७, नेकपाका १५ र जनमत पार्टीका १२ सांसद छन् । त्यस्तै, संघीय समाजवादी पार्टी र राष्ट्रिय प्रजातन्त्र पार्टीका एक–एक सांसद रहेका छन् ।
दलहरूको वर्तमान संसदीय अंकगणित र राजनीतिक समीकरणका कारण मुख्यमन्त्री यादवले विश्वासको मत पाउने वा नयाँ सरकार गठन हुने भन्ने विषय अझै अनिश्चित छ ।
