राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको नेतृत्वमा पुगेपछि पार्टीका नेता तथा कार्यकर्ताले उच्च राजनीतिक चरित्र प्रदर्शन गर्नुपर्ने बताएका छन् । जनताले निर्वाचनमार्फत मुलुकको जिम्मेवारी रास्वपालाई सुम्पिएको उल्लेख गर्दै उनले सत्ता र शक्तिको दम्भ देखाउने प्रवृत्ति त्याग्नुपर्ने बताएका हुन् ।
शुक्रबार चितवनमा आयोजित एक कार्यक्रममा बोल्दै सभापति लामिछानेले समाजले देखाएको बाटो र जनताले व्यक्त गरेका धारणालाई आत्मसात् गर्दै अगाडि बढ्न पार्टीका नेता तथा कार्यकर्तालाई आग्रह गरे ।
जनताले सरकार र पार्टीका गतिविधिको निरन्तर मूल्याङ्कन गरिरहेको भन्दै उनले आलोचना गर्ने समाजमाथि नै आक्रामक हुनु गलत राजनीतिक चरित्र भएको बताए ।
‘हाम्रो व्यवहार, हाम्रा गतिविधि र हाम्रा तौरतरिकाको समाजले विश्लेषण गर्छ । विश्लेषण गर्ने समाजमाथि जाइलाग्नु सही बाटो होइन। समाजले हामीलाई ऐना देखाएको छ, ऐनाले हाम्रो अनुहार देखाएको छ । आफ्नो अनुहार देखाएपछि ऐना देखाउनेतिर झम्टिने त्यो राजनीतिक चरित्र होइन,’ लामिछानेले भने ।
उनले जनताले दिएको जिम्मेवारीअनुसार पार्टी र सरकारका नेता तथा कार्यकर्ताले आफ्नो व्यवहार सुधार्नुपर्नेमा जोड दिए । जनताले रास्वपालाई १८२ सिट दिए पनि पार्टीका नेता तथा कार्यकर्तामा अहंकार बढेको हो कि भन्ने प्रश्नसमेत उनले उठाए ।
‘तर, हामी खरो उत्रिएका छौँ? जनताले १८२ सिट दिएका छन्, हाम्रो भुइँमा खुट्टा छैन, मात्तिएका छौँ, टुप्लिएका छौँ,’ उनले भने।
पार्टीका नेता तथा कार्यकर्ताले सर्वसाधारणलाई सम्मान गर्नुपर्ने बताउँदै लामिछानेले जनताको मतलाई ठालु पल्टिने माध्यम बनाउन नहुने धारणा राखे ।
उनले विगतमा रास्वपामा आबद्ध भएका नेता तथा कार्यकर्ताले तत्कालीन सत्ताबाट विभिन्न किसिमका प्रताडना भोग्नुपरेको स्मरण गरे। तर, विगतमा आफूहरूमाथि भएको व्यवहारको बदला लिन अहिले प्रहरी तथा प्रशासनको दुरुपयोग गर्न नहुने उनको भनाइ थियो ।
‘हिजो कोही नहुँदा, एक्लै घण्टी बोकेर हिँड्दा हामीमाथि कति धेरै अपमान भएको थियो। हाम्रा साथीहरूलाई कयौँ मुद्दा लागेका छन्, सिफारिस पाएका छैनन् । व्यापार व्यवसाय गर्ने साथीहरूको पसल बन्द गराउने, मुद्दा लगाइदिने र अनुगमनका नाममा दुःख दिने काम हिजो भएको छ,’ लामिछानेले भने ।
तर, त्यसको प्रतिशोध लिन अहिले रास्वपाको नाममा प्रहरी तथा प्रशासनलाई राजनीतिक दबाब दिन नहुने उनले स्पष्ट पारे ।
‘त्यसको बदला लिनका लागि आज हामीले म त घण्टीको मान्छे हुँ, म त रास्वपाको मान्छे हुँ भन्दै प्रशासन र प्रहरीलाई राजनीतिक दबाब दिने काम गर्यौँ भने त्यो चरित्रले हामीलाई धेरै पर लैजाँदैन। त्यसकारण हामीले भुइँ टेक्नुपर्छ, भुइँ छोड्नु हुँदैन,’ उनले भने ।
जनताले अत्यधिक मत दिएर रास्वपालाई विजयी गराउनुको अर्थ ठालु पल्टिन नभई अझ बढी जनताको सेवा गर्न भएको लामिछानेको भनाइ थियो। जनतालाई असहज हुने खालका गतिविधि पार्टीका नेता तथा कार्यकर्ताबाट स्वीकार्य नहुने उनले बताए ।
जनताले दिएको अभिमतको दुरुपयोग नगर्न चेतावनी दिँदै उनले शक्ति प्राप्त भएको अवस्थामा अझ बढी जिम्मेवार हुनुपर्नेमा जोड दिए ।
‘जनताले दिएको यो अभिमत जनताको हुर्मत लिनका लागि दुरुपयोग नगर्नुहोला, पार्टीले नियालिरहेको छ । जब तपाईंलाई सर्वाधिक शक्ति मिल्छ, त्यतिबेला नै तपाईंले सर्वाधिक जिम्मेवार भएको महसुस हुने गरी आफ्ना अभिव्यक्ति र क्रियाकलाप गर्न जरुरी हुन्छ। इतिहासले त्यो माग्छ,’ उनले भने।
उनले रास्वपाका नेता तथा कार्यकर्ताले ‘हाम्रै हातमा पुलिस छन्, हाम्रै हातमा सीडीओ छन्, हाम्रै हातमा सबै छन्’ भन्ने दम्भ त्याग्नुपर्ने पनि बताए। साथै, पार्टीभित्रको एकता कायम राख्दै जनताको अपेक्षाअनुसार काम गर्नुपर्नेमा उनले जोड दिए ।
