आगामी स्थानीय तहको निर्वाचनमा राष्ट्रिय स्वतन्त्र पार्टी (रास्वपा) बाट नगरपालिकाको मेयर, उपमेयर तथा गाउँपालिकाको अध्यक्ष र उपाध्यक्ष बन्न चाहने आकांक्षीहरूको संख्या बढ्दै गएको छ । पार्टीले सञ्चालन गरेको ‘क्यान्डिडेट क्लब’ मा उम्मेदवार बन्न इच्छुक पार्टी सदस्यहरूले नाम दर्ता गराउने क्रम जारी राखेका छन् ।
रास्वपाले गाउँपालिका अध्यक्ष र उपाध्यक्ष बन्न इच्छुकहरूका लागि गत भदौ १ गतेदेखि क्यान्डिडेट क्लबमा नाम दर्ता गर्न आह्वान गरेको थियो । त्यसैगरी, नगरपालिकाको मेयर र उपमेयर बन्न चाहनेहरूका लागि असोज २९ गतेदेखि नाम दर्ता खुला गरिएको थियो ।
पार्टीले सार्वजनिक गरेको विवरणअनुसार कोशी प्रदेशका विभिन्न पालिकामा प्रमुख र उपप्रमुख पदका लागि हालसम्म ५१६ जनाले आकांक्षा व्यक्त गर्दै नाम दर्ता गराएका छन् । तीमध्ये मेयर तथा गाउँपालिका अध्यक्ष पदका लागि ३९१ जना र उपमेयर तथा उपाध्यक्ष पदका लागि १२५ जना रहेका छन् ।
नेपाल प्रेसलाई प्राप्त विवरणअनुसार कोशी प्रदेशमा सबैभन्दा बढी आकांक्षी मोरङ जिल्लामा देखिएका छन् । मोरङमा प्रमुख र उपप्रमुख दुवै पदका लागि गरी १४३ जनाले नाम दर्ता गराएका छन् । त्यस्तै झापामा ११३, सुनसरीमा ९७, उदयपुरमा ४७ र ओखलढुङ्गामा ४४ जनाले उम्मेदवार बन्ने इच्छा व्यक्त गरेका छन् ।
यसैगरी सङ्खुवासभामा १७, तेह्रथुममा १४, सोलुखुम्बुमा १०, भोजपुरमा ९, इलाममा ६, ताप्लेजुङमा ६, धनकुटामा ५, पाँचथरमा ४ र खोटाङमा २ जनाले प्रमुख तथा उपप्रमुख पदका लागि नाम दर्ता गराएका छन् ।
४३ पालिकामा प्रमुख पदका लागि एक जना पनि आकांक्षी छैनन्
कोशी प्रदेशमा कुल १३७ वटा स्थानीय तह रहेका छन् । तीमध्ये ४३ वटा पालिकामा मेयर वा गाउँपालिका अध्यक्ष पदका लागि हालसम्म एक जनाले पनि क्यान्डिडेट क्लबमा नाम दर्ता गराएका छैनन् ।
रास्वपाको क्यान्डिडेट क्लबको तथ्याङ्कअनुसार प्रमुख पदका लागि आकांक्षी नदेखिएका सबै पालिका पहाडी जिल्लामा रहेका छन् । यसले तराईका जिल्लाको तुलनामा पहाडी जिल्लाका पालिकामा उम्मेदवार बन्ने आकांक्षा कम रहेको देखाउँछ ।
खोटाङका बराहपोखरी, दिप्रुङ चुइचुम्मा, हलेसी तुवाचुङ, जन्तेढुङ्गा, केपिलासगढी, खोटेहाङ, दिक्तेल रुपाकोट मझुवागढी र साकेला पालिकामा प्रमुख पदका लागि नाम दर्ता भएको छैन ।
त्यस्तै इलामका देउमाई, माई, माङ्सेबुङ, रोङ, सन्दकपुर र सूर्योदयमा पनि प्रमुख पदका लागि आकांक्षी देखिएका छैनन् ।
धनकुटाका चौबिसे, छथर जोरपाटी, खाल्सा छिन्ताङ सहिदभूमि, महालक्ष्मी र साँगुरीगढीमा समेत प्रमुख पदका लागि नाम दर्ता भएको छैन ।
पाँचथरका फालेलुङ, हिलिहाङ, कुम्मायक, मिक्लाजुङ र फिदिममा पनि प्रमुख पदका लागि हालसम्म कसैले इच्छा व्यक्त गरेका छैनन् ।
यसैगरी सङ्खुवासभाका चिचिला, धर्मदेवी, मकालु, सभापोखरी र सिलिचोङमा पनि अध्यक्ष पदका लागि आकांक्षी देखिएका छैनन् ।
भोजपुरका आमचोक, हतुवागढी, रामप्रसाद राई र साल्पासिलिछो तथा ताप्लेजुङका आठराई त्रिवेणी, मेरिङ्देन, मिक्वाखोला र फक्ताङलुङमा पनि प्रमुख पदका लागि नाम दर्ता भएको छैन ।
त्यस्तै सोलुखुम्बुका खुम्बुपासाङल्हामु, महाकुलुङ र सोताङ गाउँपालिकामा समेत अध्यक्ष पदका लागि कसैले नाम दर्ता गराएका छैनन्।
झापा, मोरङ र सुनसरीमा आकांक्षीको बढी चाप
कोशी प्रदेशका तराईका तीन जिल्ला झापा, मोरङ र सुनसरीमा रास्वपाबाट स्थानीय तहको प्रमुख तथा उपप्रमुख बन्न चाहने आकांक्षीको संख्या उल्लेख्य देखिएको छ ।
यी तीन जिल्लाका पालिकामा मेयर तथा अध्यक्ष पदका लागि २५१ जना र उपमेयर तथा उपाध्यक्ष पदका लागि ९७ जनाले नाम दर्ता गराएका छन् । यद्यपि विराटनगर महानगरपालिका, इटहरी उपमहानगरपालिका र धरान उपमहानगरपालिकाको विवरण उपलब्ध सूचीमा समावेश गरिएको छैन ।
झापाका १५ वटा स्थानीय तहमध्ये मेयर तथा अध्यक्ष पदका लागि ८० जनाले आकांक्षा व्यक्त गरेका छन् भने उपमेयर तथा उपाध्यक्ष पदका लागि ३३ जनाले नाम दर्ता गराएका छन् ।
प्राप्त विवरणअनुसार झापाको शिवसताक्षी नगरपालिकामा मेयर बन्न सबैभन्दा बढी १० जनाले इच्छा व्यक्त गरेका छन्। त्यस्तै बिर्तामोड नगरपालिकाको मेयर बन्न ९ जना आकांक्षी देखिएका छन् ।
मोरङका १७ वटा स्थानीय तहमध्ये प्रमुख पदका लागि १०१ जनाले नाम दर्ता गराएका छन् । त्यस्तै उपप्रमुख तथा उपाध्यक्ष पदका लागि ३९ जनाले आकांक्षा व्यक्त गरेका छन्।
मोरङमा धनपालथान गाउँपालिकाको अध्यक्ष बन्न सबैभन्दा बढी १५ जनाले नाम दर्ता गराएका छन् । कटहरी गाउँपालिकामा ११ जना र ग्रामथान गाउँपालिकामा ९ जना अध्यक्ष पदका आकांक्षी रहेका छन्। कोशी प्रदेशको एकमात्र महानगरपालिका विराटनगरको मेयर र उपमेयर पदका आकांक्षीको विवरण भने सार्वजनिक गरिएको छैन।
सुनसरीका १२ वटा स्थानीय तहमध्ये इटहरी र धरान उपमहानगरपालिकाको विवरणबाहेक बाँकी १० वटा पालिकाका प्रमुख तथा उपप्रमुख पदका लागि ७० जनाले नाम दर्ता गराएका छन् ।
उपलब्ध विवरणअनुसार सुनसरीमा प्रमुख पदका लागि ४५ जना र उपप्रमुख पदका लागि २५ जना आकांक्षी रहेका छन् । इनरुवा नगरपालिकाको प्रमुख बन्न सबैभन्दा बढी १३ जनाले इच्छा व्यक्त गरेका छन् ।
त्यस्तै कोशी गाउँपालिकाको अध्यक्ष बन्न १२ जना र देवानगञ्ज गाउँपालिकाको अध्यक्ष बन्न ११ जनाले क्यान्डिडेट क्लबमा नाम दर्ता गराएका छन् ।
रास्वपाले सञ्चालन गरेको क्यान्डिडेट क्लबमा नाम दर्ता गराउने क्रम जारी रहेकाले आगामी दिनमा आकांक्षीको संख्या थप बढ्न सक्ने देखिएको छ ।
