वीरगंज नाका हुँदै दलहनको आयातमा उल्लेख्य उतारचढाव देखिएको छ । चालु आर्थिक वर्ष २०८३/८४ को पहिलो तीन महिना (साउन–असोज) मा गत आर्थिक वर्षको सोही अवधिको तुलनामा मुसुरो, सिमी/राज्मा र केराउको आयात बढेको छ भने चना, रहर, अन्य गेडागुडी तथा बकुल्लाको आयात घटेको छ ।
वीरगंज भन्सार कार्यालयको तथ्यांकअनुसार चालु आर्थिक वर्षको असोजसम्म मुसुरोको आयात मूल्य गत आर्थिक वर्षको सोही अवधिको तुलनामा १२३ प्रतिशतले बढेको छ । गत आर्थिक वर्षको असोजसम्म ५२ करोड ३० लाख रुपैयाँभन्दा बढी मूल्यको ५३ लाख ३० हजार किलो मुसुरो आयात भएको थियो। चालु आवको सोही अवधिमा भने १ अर्ब १६ करोड ५० लाख रुपैयाँ बराबरको ६८ लाख १२ हजार किलो मुसुरो आयात भएको छ ।
त्यस्तै, सिमी तथा राज्माको आयात मूल्य ३२ प्रतिशतले बढेको छ । गत आर्थिक वर्षको पहिलो तीन महिनामा ५२ करोड ७७ लाख रुपैयाँ बराबरको ४४ लाख ४५ हजार किलो सिमी तथा राज्मा आयात भएकोमा चालु आवको सोही अवधिमा ६९ करोड ४३ लाख रुपैयाँ बराबरको ५३ लाख ६७ हजार किलो आयात भएको भन्सारको तथ्यांक छ ।
केराउको आयातमा पनि उल्लेख्य वृद्धि भएको छ । गत आर्थिक वर्षको पहिलो तीन महिनामा करिब ३ करोड ६७ लाख रुपैयाँ बराबरको १ लाख ४७ हजार किलो केराउ आयात भएको थियो। चालु आवको सोही अवधिमा भने ११ करोड १५ लाख रुपैयाँ बराबरको १६ लाख ४५ हजार किलो केराउ आयात भएको छ । मूल्यका आधारमा केराउको आयात २०३ प्रतिशतले बढेको हो ।
तर, चनाको आयात भने घटेको छ । गत आर्थिक वर्षको असोजसम्म करिब ३८ करोड ४७ लाख रुपैयाँ बराबरको ३९ लाख ३६ हजार किलो चना आयात भएकोमा चालु आवको सोही अवधिमा ३४ करोड ९८ लाख रुपैयाँ बराबरको ३६ लाख ५६ हजार किलो मात्र आयात भएको छ । यससँगै चनाको आयात मूल्यमा ९ प्रतिशतले गिरावट आएको छ ।
त्यसैगरी, रहरको आयात मूल्य १६ प्रतिशतले घटेको छ। गत आर्थिक वर्षको पहिलो तीन महिनामा करिब ८ करोड १६ लाख रुपैयाँ बराबरको ६ लाख ७६ हजार किलो रहर आयात भएको थियो। चालु आवको सोही अवधिमा भने ६ करोड ७६ लाख रुपैयाँ बराबरको ४ लाख ८९ हजार किलो मात्र आयात भएको छ।
अन्य गेडागुडीको आयातमा पनि ठूलो गिरावट देखिएको छ । गत आर्थिक वर्षको असोजसम्म १३ करोड ९४ लाख रुपैयाँभन्दा बढी मूल्यको १० लाख १६ हजार किलो अन्य गेडागुडी आयात भएकोमा चालु आवको सोही अवधिमा घटेर करिब ४ करोड ३८ लाख रुपैयाँ बराबरको ३ लाख ३३ हजार किलो मात्र आयात भएको छ । यसको आयात मूल्य ६९ प्रतिशतले घटेको छ ।
बकुल्लाको आयात पनि घटेको छ । गत आर्थिक वर्षको पहिलो तीन महिनामा वीरगंज नाका हुँदै २५ लाख रुपैयाँ बराबरको २८ हजार १ सय १० किलो बकुल्ला आयात भएकोमा चालु आवको सोही अवधिमा १६ लाख ७० हजार रुपैयाँ बराबरको १५ हजार ६ सय किलो मात्र आयात भएको भन्सारको तथ्यांकले देखाएको छ ।
वीरगंज नाका हुँदै आयात हुने दलहन भारतमा मात्र निर्भर छैन । युक्रेन, अस्ट्रेलिया, क्यानडा, ब्राजिललगायत तेस्रो मुलुकबाट पनि विभिन्न प्रकारका दलहन आयात हुने गरेका छन् । भारतसँगको खुला व्यापारिक सम्बन्धका साथै तेस्रो मुलुकबाट हुने आयातले समेत वीरगंज नाकाको दलहन व्यापारमा प्रभाव पार्ने गरेको छ ।
