काठमाडौं । नेपाल राष्ट्र बैंकले यस वर्षको धनतेरस तथा तिहारको अवसरमा करिब ३७ करोड रुपैयाँ बराबरका सुनचाँदीका सिक्का बिक्री गरेको छ । बैंकले ३० करोड रुपैयाँ बराबरको सुनको सिक्का (असर्फी) र ७ करोड रुपैयाँ बराबरको चाँदीको सिक्का (मेडालियन) बिक्री गरेको हो ।
तिहारमा सुनचाँदीका सिक्का खरिद गर्ने परम्परा रहे पनि यस वर्ष बजारमा भने अपेक्षाकृत कम कारोबार भएको व्यापारीहरूले बताएका छन् । सुनचाँदीको उच्च मूल्य, ग्राहकको घट्दो क्रयशक्ति तथा बजारको मागमा आएको कमीका कारण कारोबार सुस्त भएको उनीहरूको भनाइ छ ।
यद्यपि, नेपाल राष्ट्र बैंकमा भने सुनको सिक्काको माग उच्च देखिएको थियो । मागअनुसार उपलब्ध असर्फी छिट्टै बिक्री भएपछि बैंकमा सुनको सिक्का अभाव भएको थियो । त्यसपछि बैंकले एक दिन चाँदीका सिक्का (मेडालियन) मात्रै बिक्री गरेको थियो ।
राष्ट्र बैंकले यस वर्ष बिहीबार र शुक्रबार गरी दुई दिन मात्रै सुनचाँदीका सिक्का बिक्री गरेको थियो । सीमित समय र उपलब्ध परिमाणका बाबजुद बैंकबाट कुल ३७ करोड रुपैयाँ बराबरका सिक्का बिक्री भएका हुन् ।
बजारमा सुनचाँदीको कारोबार सुस्त रहनु तर राष्ट्र बैंकमा सुनको असर्फीको माग उच्च देखिनुले यस वर्षको तिहारमा सिक्का खरिदबिक्रीको प्रवृत्ति फरक देखिएको छ ।
