काठमाडौँ । अमेरिकी प्रतिष्ठित पत्रिका ‘टाइम’ले सन् २०२६ का लागि सार्वजनिक गरेको जलवायु क्षेत्रमा प्रभावशाली १०० व्यक्तित्वको सूचीमा नेपालका अर्थमन्त्री डा. स्वर्णिम वाग्ले समावेश भएका छन् ।
अर्थमन्त्री वाग्लेको सचिवालयका अनुसार जलवायु न्यायका पक्षमा अन्तर्राष्ट्रिय मञ्चमा गरेको पैरवी, जलवायु वित्त परिचालनका लागि गरेका पहल तथा विश्वव्यापी वित्तीय प्रणाली सुधारसम्बन्धी विचार र भूमिकाका आधारमा उनलाई उक्त सूचीमा समावेश गरिएको हो ।
विगत २८ वर्षदेखि दिगो आर्थिक विकास, सार्वजनिक नीति तथा अन्तर्राष्ट्रिय विकासका क्षेत्रमा कार्यरत वाग्लेले पछिल्लो समय नेपालले सामना गरिरहेका जलवायुजन्य जोखिम र त्यसको आर्थिक प्रभावलाई अन्तर्राष्ट्रिय बहसमा उठाउँदै आएका छन् ।
विशेषगरी रसुवा–भोटेकोशी क्षेत्रमा आएको विनाशकारी बाढीपछि उनले जलवायु परिवर्तनबाट प्रभावित मुलुकलाई अन्तर्राष्ट्रिय सहयोग र वित्तीय स्रोतमा सहज पहुँच उपलब्ध गराउनुपर्ने विषयमा जोड दिएका थिए ।
विश्वव्यापी हरितगृह ग्यास उत्सर्जनमा नेपालको योगदान न्यून रहे पनि जलवायु परिवर्तनको असमानुपातिक असर भोग्नुपरेको उल्लेख गर्दै वाग्लेले जलवायु न्याय र अन्तर्राष्ट्रिय वित्तीय संरचनामा सुधारको आवश्यकता औँल्याउँदै आएका छन् ।
अर्थमन्त्री वाग्ले यसअघि राष्ट्रिय योजना आयोगका उपाध्यक्ष, विश्व बैंकका वरिष्ठ अर्थशास्त्री तथा संयुक्त राष्ट्रसङ्घीय विकास कार्यक्रम (यूएनडीपी) को एसिया–प्रशान्त क्षेत्रीय ब्युरोका प्रमुख आर्थिक सल्लाहकारका रूपमा काम गरिसकेका छन् ।
सचिवालयले उपलब्ध गराएको विवरणअनुसार टाइमको उक्त सूचीमा संयुक्त राष्ट्रसङ्घका महासचिव एन्टोनियो गुटेरेस, बेलायती राजकुमार विलियम र युरोपेली आयोगकी अध्यक्ष उर्सुला भोन डेर लेयनलगायत अन्तर्राष्ट्रिय व्यक्तित्वसमेत समावेश छन् ।
यसैबीच, अर्थमन्त्री वाग्ले संयुक्त राष्ट्रसङ्घीय जलवायु परिवर्तनसम्बन्धी सम्मेलन (कोप–३१) मा सहभागी हुन सोमबार टर्किए प्रस्थान गरेका छन् । सम्मेलनमा उनले जलवायु वित्त, अनुकूलन तथा हिमाली क्षेत्रमा जलवायु परिवर्तनले पारेका असरबारे नेपालको धारणा प्रस्तुत गर्ने कार्यक्रम रहेको छ ।
