बारा । सभामुख डोलप्रसाद अर्यालले संविधान र विद्यमान कानूनको परिधिभित्र रहेर मात्रै देशमा विकास, समृद्धि र सुशासन सम्भव हुने बताएका छन् ।
आइतबार बाराको सिमरामा आयोजित छठ पर्वको शुभकामना आदानप्रदान कार्यक्रममा बोल्दै सभामुख अर्यालले संविधान तथा कानूनको उल्लंघन गरेर कुनै पनि काम गर्न नमिल्ने स्पष्ट पारे । देश लोकतान्त्रिक प्रणाली र कानूनी राज्यको अभ्यासमा रहेकाले विकासका क्रममा बाधक बनेका पुराना तथा अव्यावहारिक कानूनलाई संशोधन गरेर मात्रै अघि बढ्नुपर्ने उनको भनाइ थियो ।
‘हामीले देशको समृद्धि, सुशासन र विकासका लागि अबको ५०औँ वर्षसम्म संविधान संशोधन गर्न नपर्ने गरी दीर्घकालीन कानून निर्माणको आवश्यकता औँल्याएका छौँ,’ उनले भने, ‘मधेसमा सबैभन्दा छिटो, सस्तो र सजिलो तरिकाले विकास गर्न सकिने सम्भावना हुँदाहुँदै पनि यहाँको शिक्षा, स्वास्थ्य, सडक र सामाजिक विकास पछि पर्नु चिन्ताको विषय हो ।’
सभामुख अर्यालले चार वर्षअघि राजनीतिमा प्रवेश गरेदेखि नै मधेसको विकास र समृद्धिको विषय आफ्नो प्राथमिकतामा रहेको बताए । जनप्रतिनिधि जनताका सेवक भएकाले विकास र सुशासनका लागि सामाजिक दबाब तथा निरन्तर बहस आवश्यक रहेको उनको भनाइ थियो ।
विश्वका विभिन्न देश लामो समयको प्रयासपछि मात्रै विकसित भएको उदाहरण दिँदै उनले विकासका क्रममा केही ढिलाइ भए पनि हतारिन नहुने धारणा राखे । विकासका लागि स्थानीय सरकार सबैभन्दा बढी जिम्मेवार र गम्भीर हुनुपर्ने उल्लेख गर्दै उनले स्थानीय तहका जायज माग पूरा गराउन प्रदेश तथा संघ सरकारसँग निरन्तर पहल र पैरवी गर्न सुझाव दिए ।
स्थानीय तहमा देखिएका समस्या प्रदेश र संघ सरकारसम्म पुर्याउँदै माग सम्बोधन नभएसम्म निरन्तर लबिङ गर्नुपर्नेमा उनले जोड दिए ।
सभामुख अर्यालले सरकारको निर्देशन र सुरक्षा निकायको नियन्त्रणले मात्रै सामाजिक समस्या समाधान नहुने बताए । त्यसका लागि बालबालिकालाई सानै उमेरदेखि उचित शिक्षा दिनुपर्ने र समाज स्वयं सचेत हुनुपर्ने उनको भनाइ थियो ।
मधेस हिमाल, पहाड र तराईबाट आएका नागरिक मिलेर बसेको सुन्दर बगैँचाजस्तै रहेको उल्लेख गर्दै उनले सामाजिक सद्भाव र एकता कायम राख्न सबैलाई आग्रह गरे ।
मधेसको शिक्षा, स्वास्थ्य, सामाजिक तथा भौतिक विकासका लागि कानून निर्माणको तहबाट आफूले पूर्ण सहयोग गर्ने प्रतिबद्धतासमेत उनले जनाए ।
छठ पर्वको अवसरमा बारा र पर्साका विभिन्न छठघाटको दर्शन तथा अवलोकनका लागि सडकमार्ग हुँदै सिमरा पुगेका सभामुख अर्यालले जीतपुरसिमरा उपमहानगरपालिका–४ स्थित नवनिर्मित श्रीकृष्ण मन्दिरको समेत अवलोकन गरेका छन् ।