काठमाडौं । आगामी करिब दुई सातासम्म देशभर वर्षा गराउने कुनै मौसमी प्रणाली सक्रिय हुने सम्भावना नरहेको मौसमविद्हरूले बताएका छन् । तत्काल वर्षा गराउने प्रणाली विकसित नहुँदा देशका अधिकांश भूभागको मौसम मुख्यतया सफा रहने अनुमान गरिएको छ ।
पहाडी भेगका केही स्थानमा मेघगर्जन र चट्याङसहित वर्षा भए पनि अब तत्काल वर्षाको सम्भावना नरहेको जनाइएको छ ।
मौसमविद् विनोद पोखरेलका अनुसार वर्षा गराउने मौसमी प्रणाली सक्रिय नहुँदा आगामी दुई सातासम्म देशका अधिकांश क्षेत्रमा मौसम सफा रहनेछ । बंगालको खाडीमा विकसित हुने मौसमी प्रणालीका कारण समेत नेपालमा वर्षा हुने सम्भावना नरहेको उनले जानकारी दिएका छन् ।
लामो समयसम्म वर्षाको सम्भावना न्यून देखिएसँगै आगामी दिन पदयात्रा (ट्रेकिङ), हाइकिङ तथा आन्तरिक र बाह्य पर्यटनका लागि अनुकूल हुने देखिएको छ । मौसम सफा रहने भएकाले घुमघाम तथा यात्राको योजना बनाउनेहरूलाई सहज हुने अपेक्षा गरिएको छ ।
यसले पर्यटकीय गतिविधिमा समेत सकारात्मक प्रभाव पार्ने अनुमान गरिएको छ ।