सिरहाको गोलबजार नगरपालिका–६ स्थित सैनिक चोक नजिकैको पोखरीमा एक सातादेखि बेपत्ता रहेका एक पुरुषको शव फेला परेको छ ।
बुधबार पोखरीमा शव देखेपछि स्थानीयवासीले प्रहरीलाई खबर गरेका थिए । घटनास्थल पुगेको प्रहरीले शव बाहिर निकालेर पहिचान गर्दा मृतक गोलबजार नगरपालिका–३ भाङबारीका ४५ वर्षीय महेन्द्र चमार रहेको पुष्टि भएको हो ।
परिवारका अनुसार चमार भाइटीकाको भोलिपल्टदेखि सम्पर्कविहीन भएका थिए । उनी मजदुरीका क्रममा अन्यत्रै बसेको हुन सक्ने आशंकामा परिवारले प्रहरीमा हराएको उजुरी दिएका थिएनन् ।
इलाका प्रहरी कार्यालय गोलबजारबाट प्रहरी निरीक्षक दीपक खरेलको नेतृत्वमा खटिएको टोलीले पोखरीबाट शव निकालेको थियो ।
प्रहरीका अनुसार शवको अवस्था हेर्दा करिब एक साताअघि नै पोखरीमा रहेको हुन सक्ने प्रारम्भिक अनुमान गरिएको छ । यद्यपि उनको मृत्युको वास्तविक कारण खुल्न सकेको छैन ।
शव पोस्टमार्टमका लागि प्रादेशिक अस्पताल लहान पठाइएको जिल्ला प्रहरी कार्यालय सिरहाले जनाएको छ । घटनाबारे थप अनुसन्धान भइरहेको प्रहरीले जानकारी दिएको छ ।