महोत्तरीको गौशाला नगरपालिका–१ सानो कुशमाडीस्थित उखुबारीमा एक महिलाको शव फेला परेको छ । स्थानीय ६५ वर्षीया विणामाया पुलामी शुक्रबार बिहान मृत अवस्थामा फेला परेकी हुन् ।
इलाका प्रहरी कार्यालय गौशालाका प्रहरी निरीक्षक मधुसुदन विश्वकर्माका अनुसार पुलामी बिहीबार घाँस काट्न भन्दै घरबाट निस्किएकी थिइन् । तर, उनी शुक्रबार बिहान उखुबारीमा मृत अवस्थामा भेटिएकी हुन् ।
शवको प्रकृति हेर्दा उनको हत्या भएको हुनसक्ने प्रहरीको प्रारम्भिक अनुमान छ । मृतकको घाँटीमा गम्छा कसिएको जस्तो देखिएको प्रहरी निरीक्षक विश्वकर्माले जानकारी दिए ।
‘गम्छाले घाँटी कसेको जस्तो देखिन्छ । हत्याको आशंकामा सूक्ष्म अनुसन्धान थालेका छौँ,’ उनले भने ।
घटनाको अनुसन्धानका लागि प्रहरी नायब उपरीक्षक (डीएसपी) सहितको टोली घटनास्थल पुगेको छ । प्रहरीले तालिमप्राप्त कुकुरसमेत परिचालन गरी घटनाबारे अनुसन्धान अघि बढाएको जनाएको छ ।
प्रहरीले घटनाको वास्तविक कारण र संलग्न व्यक्तिको पहिचान गर्न अनुसन्धान गरिरहेको छ ।