मधेश प्रदेशकाे रौतहटमा एकजना परीक्षा निरीक्षक सहित दुई जनालाई पक्राउ गरिएको छ । भने सप्तरी जिल्लामा एसईई परीक्षा अमर्यादित क्रियाकलाप गर्ने दुई जना केन्द्राध्यक्षलाइ कार्वाही गरिएकाे छ ।
मधेश प्रदेशको रौतहट जिल्लाको यमुनामाई गाउँपालिका स्थित श्री यमुनामाई माध्यमिक विद्यालय झुन्खुन्वा परीक्षा केन्द्रमा पैसा लिई चिट चोर्न सहयोग गरेको आरोपमा एकजना परीक्षा निरीक्षक सहित दुई जनालाई प्रहरीले पक्राउ गरेको छ ।
सोही परीक्षा केन्द्रका परीक्षा निरीक्षक र मौलापुर–५ को श्री लक्ष्मिनियाँ मावि परीक्षा केन्द्रमा बाहिरबाट चिट पठाउने एकजनालाई पक्राउ गरिएको हो । रौतहट प्रहरी प्रवक्ता दीपककुमार रायका अनुसार पक्राउ परेका दुवैले परीक्षाको पहिलो दिन पैसा लिएर परीक्षार्थीहरूलाई चिट उपलब्ध गराउने उद्देश्यले परीक्षा हलमा मोबाइल लुकाएर प्रवेश गराएका थिए । प्रहरीले रौतहटका विभिन्न परीक्षा केन्द्रमा चेकजाँच गर्दै परीक्षार्थीहरूले शरीरमा लुकाइछिपाई ल्याएका ४ सय २४ वटा मोबाइल बरामद गरेको छ । पक्राउ परेका माथि परीक्षाको मर्यादा भंग गरेको आरोपमा मुद्दा दर्ता गरी रौतहट जिल्ला अदालतबाट म्याद थप गरी आवश्यक अनुसन्धान भइरहेको प्रहरीले जनाएको छ ।
यसैगरी जिल्ला परीक्षा सुरक्षा समितिका अध्यक्षसमेत रहेका सप्तरीका प्रमुख जिल्ला अधिकारी भोला दाहाल नेतृत्वमा खटिएको अनुगमन टोलीले दुईवटा केन्द्राध्यक्षलाई कार्वाही गरेको जनाएका छन् । विष्णुपुर गाउँपालिका स्थित जनता माध्यमिक विद्यालय इटहरी विष्णुपुरका केन्द्राध्यक्ष र हनुमाननगर कंकालिनी नगरपालिकास्थित महावीर माध्यमिक विद्यालय हनुमाननगरका केन्द्राध्यक्षलाई कारबाही गरिएको हो ।
विष्णुपुरमा एउटा कोठामा एकै विद्यालयका परीक्षार्थी राखेर परीक्षा दिलाइरहेको पाईएपछि केन्द्राध्यक्ष, सहायक केन्द्राध्यक्ष र ६ जना निरीक्षकलाई कारबाही गरिएको प्रजिअ दाहालले बताए । यसैगरी हनुमाननगरमा केही कक्षाकोठाबाट १० वटा प्रश्नको उत्तरसमेत लेखिएको चिट बरामद भएपछि केन्द्राध्यक्ष, २ जना सहायक केन्द्राध्यक्ष र १५ जना निरीक्षकलाई कारबाही गरिएको हो ।
उनीहरुलाई कारवाही गर्न शिक्षा विकास तथा समन्वय इकाइमा लेखेर पठाइसकेको र नयाँ केन्द्राध्यक्षसमेत तोकिएको छ ।
यस वर्ष सप्तरीमा ९० सामुदायिक विद्यालय र ५२ संस्थागत विद्यालय गरि १ सय ४२ विद्यालयका ८ हजार ७ सय १५ विद्यार्थी एसईईमा सहभागी भएका छन् । जसमा साधारण तर्फबाट ७ हजार ८ सय ४८, प्राविधिकतर्फ ३ सय ९ र ग्रेडबृद्धि तर्फबाट ५ सय ५८ विद्यार्थी छन् । परीक्षाका लागि ३७ वटा परीक्षा केन्द्र निर्धारण गरिएको छ ।
पर्सा जिल्लाको २९ परिक्षा केन्द्रमा संचालित परिक्षा शान्तिपूर्ण रुपमा सम्पन्न भएको शिक्षा विकास तथा समन्वय इकाई पर्साका प्रमुख हरि राउत कुर्मीले जानकारी गराएका छन् ।
एसईई परिक्षाको पहिलो दिन बिहिबार अङ्ग्रेजी विषयको परिक्षा ७० सामुदायिक तथा ७५ संस्थागत विद्यालयका ९ हजार ५ सय ३१ विद्यार्थी सहभागि भएको प्रमुख कुर्मीले जानकारी दिए । उनका अनुसार ११ हजार ४ सय १३ विद्यार्थीले एसईई परिक्षाको फारम भरेपनि ९ हजार ५ सय ३१ मात्र विद्यार्थी पहिलो दिनको परिक्षामा सहभागि भएका छन् । बाँकी एक हजार ८ सय ८२ परीक्षार्थीहरू अनुपस्थित भएका थिए ।
यसैगरी ५ जना परिक्षार्थीहरु वीरगंज कारागारबाट र ५ जना परिक्षार्थीहरु बाल सुधार गृह वीरगंजबाट एसईई परिक्षा दिइरहेको प्रमुख कुर्मीले बताए । पर्सामा एसईई परिक्षाको पर्साका प्रमुख जिल्ला अधिकारी -सिडिओ_ गणेश अर्यालय लगायतको अनुगमन टोलीले अनुगमन गरेको छ ।
यसैगरी बारामा पनी शान्तिपूर्ण वातावरणमा एसईई परीक्षा भएको छ । बारामा एसईई परिक्षालाई मर्यादित बनाउन जिल्ला प्रशासन कार्यालय बाराका प्रमुख जिल्ला अधिकारीको नेतृत्वमा मूल अनुगमन समितिसहित १३ उप–अनुगमन समिति गरि १४ अनुगमन समिति खटिएको थियो ।
मधेशकाे अन्यत्र जिल्ला सर्लाही, धनुषा, महोतरी, सिरहामा समेत समान्य केहि चिटचोर्ने बाहेक शान्तिपुर्ण रुपमा एसईई भएको जनाएकाे छ ।
