वीरगंज महानगरपालिका–३१ बेल्वास्थित इस्लामपुर स्कुल, उन्नति प्राथमिक विद्यालयलगायतका विद्यालयमा पछिल्लो चार वर्षदेखि पटक–पटक विवाद हुँदै आए पनि समस्या समाधान हुन नसकेको वडाध्यक्ष जितेन्द्र यादवले बताएका छन् ।
विद्यालयमा देखिएका विवाद तथा व्यवस्थापकीय कमजोरीका कारण विद्यार्थीको नियमित पठनपाठन र शैक्षिक गतिविधि प्रभावित भइरहेको उनको भनाइ छ ।
वडाध्यक्ष यादवका अनुसार आफ्नो वडाका विद्यालयसहित वीरगंज महानगरपालिकाका विभिन्न विद्यालयमा लामो समयदेखि समस्या देखिए पनि समाधानका लागि प्रभावकारी पहल हुन सकेको छैन । विद्यालय सञ्चालन तथा व्यवस्थापनसम्बन्धी कागजपत्रमा नियमित पठनपाठन भइरहेको देखाइए पनि व्यवहारमा अवस्था फरक रहेको उनले दाबी गरेका छन् ।
यादवले महानगरपालिकाको शिक्षा शाखाप्रति समेत असन्तुष्टि व्यक्त गरेका छन् । शिक्षा शाखा प्रमुख आनन्द लामिछानेले आफ्नो जिम्मेवारी प्रभावकारी रूपमा निर्वाह नगरेको उनको आरोप छ । विद्यालयहरूमा लामो समयदेखि विवाद र समस्या रहँदा पनि शिक्षा शाखाले अनुगमन तथा समाधानका लागि आवश्यक पहल नगरेको यादवको भनाइ छ ।
विद्यालयमा देखिएका समस्या समाधान गरी नियमित पठनपाठनको वातावरण बनाउन पटक–पटक आग्रह गर्दा पनि महानगरपालिकाको शिक्षा शाखाले हालसम्म एकपटक पनि अनुगमन नगरेको वडाध्यक्ष यादवले बताएका छन् ।
उनका अनुसार विद्यालयको भवन र भौतिक संरचना निर्माण गरेर मात्रै शैक्षिक सुधार सम्भव हुँदैन । त्यसका लागि नियमित पठनपाठन, शिक्षकको जिम्मेवारीप्रतिको जवाफदेहिता र विद्यालयको प्रभावकारी अनुगमन आवश्यक हुन्छ ।
विद्यालयमा देखिएका विवाद अन्त्य गरी विद्यार्थीले नियमित रूपमा पढ्न पाउने वातावरण बनाउन महानगरपालिकाको शिक्षा शाखाले तत्काल अनुगमन गरी आवश्यक सुधारका कदम चाल्नुपर्ने यादवको माग छ ।
विद्यालयमा चार वर्षदेखि समस्या रहँदा पनि अनुगमन नभएको वडाध्यक्षको आरोपबारे महानगरपालिकाको शिक्षा शाखाको धारणा र प्रतिक्रिया सार्वजनिक हुन सकेको छैन ।
