शिक्षक सेवा आयोगले बढुवाको योग्यताक्रम सूचीमा परेका करिब ६ हजार शिक्षकको उजुरीमाथि पुनरवलोकन गरी नतिजा प्रकाशन गर्ने कार्यलाई तीव्रता दिएको छ ।
आयोगका प्रवक्ता परशुराम तिवारीका अनुसार बढुवा सिफारिस समितिको सचिवालयबाट भएको निर्णयबमोजिम कार्यसम्पादन मूल्याङ्कनका आधारमा हुने ७५ प्रतिशततर्फको बढुवा योग्यताक्रम सूची धमाधम प्रकाशन भइरहेको छ ।
‘शिक्षक सेवा आयोग कार्य सञ्चालन कार्यविधि, २०७८’ (संशोधनसहित) को परिच्छेद १५ मा भएको व्यवस्थाअनुसार आयोगले प्राप्त कागजात तथा प्रमाणहरूको अध्ययन गरी सम्बन्धित जिल्ला र तहका शिक्षकको बढुवा नतिजा कायम गर्ने प्रक्रिया अघि बढाएको हो ।
विभिन्न प्रदेशका शिक्षा हेर्ने मन्त्रालयअन्तर्गतका शिक्षा विकास निर्देशनालयबाट गरिएको कार्यसम्पादन मूल्याङ्कनविरुद्ध परेका उजुरीमाथि अध्ययन तथा छानबिन गरी आयोगले पुनरवलोकनको नतिजा प्रकाशन गर्दै आएको छ। तर, आयोगका पदाधिकारी रिक्त भएपछि पछिल्लो छ महिनादेखि पुनरवलोकनको काम रोकिएको थियो ।
आयोगले चालु कात्तिक महिनामा माध्यमिक द्वितीय तहअन्तर्गत इलाम, सुनसरी, झापा र सोलुखुम्बु जिल्लाको पुनरवलोकन नतिजा प्रकाशन गरेको छ । यसअघि असोज २९ गते प्राथमिक द्वितीय तहअन्तर्गत लमजुङ, बाग्लुङ, गोरखा, नवलपरासी (बर्दघाट सुस्ता पूर्व) र कास्की जिल्लाको पुनरवलोकन नतिजा सार्वजनिक गरिएको थियो ।
नेपाल सरकारले गत भदौ २५ गते आयोगको अध्यक्षमा डा. हरिप्रसाद लम्सालसहित पदाधिकारी नियुक्त गरेको थियो । यसअघि गत वैशाख १८ गते जारी ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३’ का कारण आयोगका पदाधिकारी पदमुक्त भएपछि आयोग नेतृत्वविहीन बनेको थियो ।
पदाधिकारी नियुक्त भएसँगै रोकिएको पुनरवलोकन प्रक्रिया अघि बढेको आयोगले जनाएको छ ।
