जनकपुरधाम । धनुषाको क्षिरेश्वरनाथ नगरपालिका–८, दिगम्बरपुरका शिवशंकर महतोको हत्या प्रकरणमा उनकै श्रीमती पक्राउ परेकी छन् ।
प्रहरीले श्रीमती सिर्जना महतोलाई नियन्त्रणमा लिएर अनुसन्धान अघि बढाएको जिल्ला प्रहरी कार्यालय महोत्तरीका डिएसपी सन्तुलाल जयसवारले जानकारी दिए ।
गत शुक्रबार साँझ महोत्तरीको गौशाला नगरपालिका–८ स्थित सागरनाथ वन विकास परियोजनाको जंगलमा रहेको रेलवे ट्र्याकदेखि करिब १०० मिटर पर शिवशंकरको शव फेला परेको थियो ।
प्रहरीका अनुसार, मृतक महतोको टाउकोमा खुकुरी प्रहार गरिएको थियो भने उनको शव जलाइएको अवस्थामा फेला परेको थियो । सनाखत गर्न नसकियोस् भनेर अनुहार जलाइएको प्रहरीको प्रारम्भिक अनुसन्धानले देखाएको छ ।
शिवशंकर श्रीमती सिर्जना सँगै ससुराली जाँदै थिए, त्यही क्रममा घटना भएको हुनसक्ने प्रहरीको अनुमान छ ।
डिएसपी जयसवारका अनुसार घटनामा अन्य व्यक्तिहरूको समेत संलग्नता देखिएको छ । उनीहरूको पहिचान भइसकेको र थप अनुसन्धान जारी रहेको प्रहरीले जनाएको छ ।
