रौतहटमा स्रोत खुलाउन नसकेको १० लाख रुपैयाँ नगदसहित एक भारतीय नागरिकलाई प्रहरीले पक्राउ गरेको छ ।
पक्राउ पर्नेमा भारतको बिहार राज्यअन्तर्गत मोतिहारी जिल्ला, घोडासन ग्रामका ३३ वर्षीय टुना दास रहेका छन् । मधेस प्रदेश प्रहरी कार्यालयका अनुसार सोमबार दिउँसो रौतहटको बौधीमाई नगरपालिका–७ बंकुलस्थित बंकुल–नरकटिया सडकखण्डबाट उनलाई पक्राउ गरिएको हो ।
प्रहरी चौकी बंकुलबाट खटिएको प्रहरी टोलीले बाराबाट रौतहटतर्फ आउँदै गरेको बीआर ०५ एएफ ३७८७ नम्बरको मोटरसाइकल जाँच गर्ने क्रममा लुकाइछिपाइ राखिएको अवस्थामा नगद फेला पारेको थियो । प्रहरीका अनुसार दासको साथबाट एक हजार रुपैयाँ दरका ५९३ थान र पाँच सय रुपैयाँ दरका ८१४ थान गरी कुल १० लाख रुपैयाँ बरामद गरिएको हो ।
बरामद रकमको स्रोत खुलाउन नसकेपछि प्रहरीले नगदसहित दासलाई नियन्त्रणमा लिएको जनाएको छ । घटनाका सम्बन्धमा प्रहरीले आवश्यक अनुसन्धान अघि बढाएको छ ।
