बुद्ध एयरको जहाजको टायर पञ्चर भएपछि सोमबार राजविराज विमानस्थलबाट काठमाडौँ जाने यात्रु घण्टौँसम्म विमानस्थलमै रोकिएका छन् । निर्धारित समयभन्दा साढे तीन घण्टा ढिलो राजविराज आइपुगेको जहाज अवतरणपछि टायर पञ्चर हुँदा यात्रु थप समस्यामा परेका हुन् ।
सोमबार दिउँसो २ बजे राजविराज आइपुग्नुपर्ने जहाज काठमाडौँ विमानस्थलमा भएको हवाई चाप र प्रतिकूल मौसमका कारण साँझ ५ः३० बजे मात्रै राजविराज पुगेको थियो । यात्रु ओरालिसकेपछि जहाजको टायर पञ्चर भएको जानकारी दिइएपछि काठमाडौँ जान प्रतीक्षारत यात्रु अन्योलमा परेका थिए ।
लामो समयसम्म उडान अनिश्चित हुँदा यात्रुहरूले व्यक्तिगत, शैक्षिक तथा व्यावसायिक काम प्रभावित भएको भन्दै असन्तुष्टि व्यक्त गरेका छन् । विशेषगरी काठमाडौँ हुँदै विदेश जाने अन्तर्राष्ट्रिय उडानको टिकट काटेका यात्रुहरू समयमै गन्तव्यमा पुग्न नसक्दा आर्थिक क्षति बेहोर्नुपर्ने चिन्तामा परेका छन् ।
एक यात्रुले राति १० बजे विदेश जाने उडानको टिकट रहेको बताउँदै निर्धारित समयमा काठमाडौँ पुग्न नसके त्यसबाट हुने क्षतिको जिम्मेवारी कसले लिने भन्दै प्रश्न गरेका छन् । त्यस्तै, भोलिपल्टदेखि परीक्षा रहेकी एक छात्राले जहाजको उडान ढिलाइले आफ्नो परीक्षा नै प्रभावित हुने चिन्ता व्यक्त गरेकी छन् ।
दिउँसो १ बजेदेखि नै विमानस्थल पुगेका यात्रुहरू साँझसम्म पनि उडानको निश्चित समय नपाउँदा भोक र प्यासले समेत समस्यामा परेको गुनासो गरेका छन् । लामो प्रतीक्षाका कारण विमानस्थलमा यात्रुहरूको असन्तुष्टि र आक्रोश बढेको थियो ।
बुद्ध एयर राजविराजका वरिष्ठ अधिकृत सन्दीप खवासका अनुसार पञ्चर भएको टायर मर्मतका लागि विराटनगरबाट अर्को जहाजमार्फत प्राविधिक टोली राजविराज आइपुगेको थियो । प्राविधिक टोलीले टायर मर्मत गर्न करिब एक घण्टा लाग्ने र त्यसपछि जहाज काठमाडौँका लागि उडान भर्ने जानकारी दिएको उनले बताए ।
सोमबार राजविराजबाट काठमाडौँ जाने ६९ जना यात्रुले टिकट काटेका थिए। जहाज ढिलाइ भएपछि आठदेखि १० जनाले टिकट रद्द गराएको तथा पाँच जनाले मंगलबारका लागि टिकट सारेको खवासले जानकारी दिए । बाँकी ५८ जना यात्रुलाई लिएर जहाज काठमाडौँ उड्ने उनको भनाइ छ ।
जहाजमा प्राविधिक समस्या आउनु प्राविधिक कारण भए पनि त्यसबाट प्रभावित यात्रुलाई समयमै स्पष्ट जानकारी दिने, लामो प्रतीक्षाका क्रममा आवश्यक खानपान तथा अन्य सुविधाको व्यवस्था गर्ने र सम्भावित आर्थिक क्षतिबारे उचित जवाफ दिने दायित्व विमान सेवा कम्पनीको हुने यात्रुहरूको गुनासो छ ।
विशेषगरी अन्तर्राष्ट्रिय उडान छुट्ने जोखिममा रहेका यात्रु र परीक्षा दिनुपर्ने विद्यार्थीको समस्यालाई ध्यानमा राख्दै बुद्ध एयरले यात्रुको असुविधा तथा सम्भावित क्षतिबारे कस्तो व्यवस्था गर्छ भन्ने प्रश्न उठेको छ ।
