वीरगञ्जस्थित ठाकुरराम बहुमुखी क्याम्पसको स्वतन्त्र विद्यार्थी युनियन (स्ववियु) चुनावमा १६ वर्षपछि स्वतन्त्र समूहले विजय हासिल गर्दै नयाँ नेतृत्व चयन गरेको छ ।
राजकुमार यादव सभापतिमा निर्वाचित भएपछि राजनीतिक दलका शीर्ष नेताहरूको टाउको दुखाइ भएको छ ।
कतिपयको बुझाइमा दलको नेतृत्व क्षमता कमजोर भएपछि पराजय भएको बताउँछ भने, केहीले ‘हाम्रोभन्दा मेरो’ हठले पराजयको कारण बनेको टिप्पणी गरेका छन् । स्थानीय तहको चुनावमा टिकटका लागि किनवेच गर्न पल्किएका कतिपय नेताहरूको सुझबुझलाई विद्यार्थीहरूले नराम्ररी झापड दिएको यस चुनावले दिएको देखिन्छ ।
स्वतन्त्र समूहको उदयलाई राजनीतिक विश्लेषकहरूले दलगत गुटबन्दी र नेतृत्वको असक्षमताको परिणामका रूपमा व्याख्या गरेका छन् । यसले नेविसंघ, अनेरास्ववियू, समाजवादी जस्ता ठूला विद्यार्थी संगठनहरूलाई आगामी दिनमा नयाँ रणनीति बनाउन चुनौती समेत थपेको छ ।
बिहीबार सम्पन्न मतगणनामा राजकुमार यादवले १,११५ मत प्राप्त गर्दै निकटतम प्रतिस्पर्धी विकास मण्डल धानुकलाई पराजित गरे । धानुकले ६५३ मत मात्र प्राप्त गरेका थिए । यादव नेविसंघका असन्तुष्ट समूहबाट स्वतन्त्र लडेका थिए ।
सभापतिसँगै यादव प्यानलका अन्य सदस्यहरूले पनि पदमा जित हासिल गरेका छन् । सचिवमा मन्दिरा चौधरी ६७२ मतसहित विजयी भइन् भने कोषाध्यक्षमा अंकित पटेलले ८२२ मत ल्याउँदै सफलता हात पारे । राजकुमार यादव सहितका विजयीहरू नेविसंघका उम्मेदवार भए पनि पार्टीभित्रको गुटबन्दी र नेतृत्वको असहमतिको कारण उनलाई आधिकारिक टिकट दिन पार्टीले अस्वीकार गरेपछि उनीहरू स्वतन्त्र रूपमा चुनाव लड्ने निर्णय गरेका थिए ।
यादवको स्वतन्त्र उम्मेदवारीले दलहरूको प्रभावलाई पछाडि धकेल्दै स्वतन्त्र समूहको जिते भएको छ ।
यादवको प्यानलको विजयले ठाकुरराम क्याम्पसमा १६ वर्षपछि दलहरूको वचर्स्व तोड्दै स्वतन्त्र समूहको वर्चस्व कायम भएको छ । दलहरूले समर्थन नगरे पनि केही नेताहरूको समथर्न र विद्यार्थीहरूको साथ पाएका राजकुमार यादव समूहको नेतृत्वले अब स्वतन्त्र विद्यार्थी हितमा काम गर्ने प्रतिवद्धता व्यक्त गरेका छन् ।
सम्बन्धीत समाचार
ठाकुरराम क्याम्पसमा नेविसंघको हार, काङ्ग्रेसभित्रको असन्तोष ठेकेदारी शैली र गुटबन्दी प्रमुख कारण हो : काङ्ग्रेस युवा नेता कञ्चन झा
