बुद्ध एयरले राजविराज विमानस्थलबाट चैत १९ गतेदेखि दैनिक दुई उडान गर्ने भने पनि रात्रिकालीन उडान अन्योलमा परेको छ ।
२०८१ मंसिर २९ गते संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले राजविराज विमानस्थलबाट रात्रिकालीन परीक्षण उडानको प्रारम्भ गरेपछि नियमित रात्रिकालीन उडान सुरु हुने अपेक्षा गरिएको थियो । हालसम्म बुद्ध एयरले राजविराजबाट काठमाडौंका लागि दिउँसो २ बजे मात्र एक उडान सेवा दिँदै आएको छ ।
तर यात्रुको चाप बढेसँगै थप उडान आवश्यक परेपछि मन्त्री पाण्डेको उपस्थितिमा रात्रीकालीन परीक्षण उडान गरिएको थियो । त्यसपछि १ अप्रिलदेखि दिनको १२:२५ बजे र साँझ ६ बजे गरी दुई उडान सेवा सुरु हुने तालिका सार्वजनिक भएको थियो । तर, शुक्रवार बुद्ध एयरले तोकिएको मितिमा रात्रिकालीन उडान सुरु नहुने जानकारी दिएपछि यो सेवा पुनः अनिश्चित बनेको छ ।
बुद्ध एयरका स्टेशन म्यानेजर अनिल राजवंशीका अनुसार एयर ट्राफिक व्यवस्थापन, नोटम एक्सचेन्ज र फ्लाइट तालिका अनुमतिको प्रक्रियामा काठमाण्डौस्थित उडान विभागबाट अनुमति प्राप्त गर्न ढिलाइ भएकोले उडान समय सारिएको हो । उनले भने, “रात्रिकालीन विमान सेवा सुरु गर्न थप एकदेखि डेढ महिना लाग्न सक्छ ।”
विमान सेवा सुरु नहुँदा यात्रुलाई समस्या भइरहेको उद्योग वाणिज्य संघ सप्तरीका अध्यक्ष लालुप्रसाद अग्रवालले बताए । उनले भने, “यात्रुको संख्या बढ्दो छ, तर उडान सेवाको अभावले कठिनाइ बढेको छ ।” राजविराज विमानस्थलका प्रमुख ध्रुव श्रेष्ठका अनुसार विमानस्थलमा रात्रिकालीन उडानका लागि सबै भौतिक पूर्वाधार तयार छन् । तर, पटक–पटक उडान मिति सार्दै आएका एयरलाइन्सले नै वास्तविक कारण खुलाउनुपर्ने उनले बताए ।
यात्रुको चाप दिन प्रतिदिन बढ्दो भए पनि रात्रिकालीन उडान स्थगित भइरहँदा यात्रुहरू निराश भएका छन् ।
स्थानीय बासिन्दाले शीघ्र रात्रिकालीन उडान सेवा सञ्चालन गर्न सरकारसँग माग गरेकाे छ ।
