जनकपुरधाम | मधेश प्रदेश सरकारले जनकपुरधामको सौन्दर्यीकरणलाई बहुवर्षीय योजनाअन्तर्गत अघि बढाउँदै आधुनिक सार्वजनिक शौचालय निर्माणलाई विशेष प्राथमिकता दिएको छ ।
प्रदेश सरकारले जनकपुरधामका प्रमुख पर्यटकीय क्षेत्रहरूमा आधुनिक सुविधायुक्त शौचालय निर्माण गर्ने निर्णय गरेको हो । मुख्यमन्त्री सतिशकुमार सिंहका अनुसार बस पार्क, राम मन्दिरको दक्षिणपट्टि र जानकी मन्दिरको दक्षिण कुनामा अत्याधुनिक सार्वजनिक शौचालय निर्माण गरिनेछ ।
मुख्यमन्त्री सिंहले जनकपुरधाम धार्मिक तथा सांस्कृतिक केन्द्र भएकाले यहाँ आउने भक्तजन र पर्यटकका लागि सफा तथा व्यवस्थित सार्वजनिक शौचालयको आवश्यकता रहेको बताए। ‘हामीले यही आवश्यकतालाई मध्यनजर गर्दै यो योजना अघि बढाएका हौँ,’ उनले भने ।
शौचालय निर्माणका लागि आवश्यक टेन्डर प्रक्रिया सुरु भइसकेको छ। मधेश प्रदेश नीति आयोगका उपाध्यक्ष डा. सोहनप्रसाद साह, जनकपुरधाम उपमहानगरपालिकाका मेयर मनोज साह लगायत सरोकारवाला निकाय र मन्त्रालयका प्राविधिक टोलीले परियोजनाको संयोजन गरिरहेका छन् ।
यस योजनाका लागि तयार गरिएका आर्किटेक्चरल डिजाइनहरू सार्वजनिक गरिएका छन्। निर्माण हुन लागेका शौचालयहरूमा स्वच्छता, सहज पहुँच र वातावरणमैत्री संरचनाहरू समेटिनेछन् ।
प्रदेश सरकारले आगामी वर्षहरूमा अन्य क्षेत्रहरूमा पनि यस्ता सुविधाहरू विस्तार गर्ने योजना बनाएको छ। यो कदमले जनकपुरधामको विकास, सफाइ र पर्यटन प्रवद्र्धनमा महत्वपूर्ण योगदान पुर्याउने अपेक्षा गरिएको छ ।
