मधेश प्रदेशका मुख्यमन्त्री सतिशकुमार सिंहले शुक्रबार धनुषाको मिथिला नगरपालिका–४ मा पर्ने जलाद खोलाको स्थलगत अनुगमन गरेका छन् ।
अनुगमनका क्रममा खोलामा अवैध रूपमा नदीजन्य पदार्थ उत्खननमा संलग्न सातवटा टिपर र दुईवटा जेसिबी मेसिन नियन्त्रणमा लिइएका छन् । उक्त सवारी साधनहरूलाई इलाका प्रहरी कार्यालय ढल्केबरको जिम्मा लगाइएको छ । मुख्यमन्त्री सिंहले वातावरणीय नियम मिचेर सञ्चालन भइरहेको ठेक्का प्रक्रियाप्रति कडा असन्तुष्टि जनाउँदै जिम्मेवार निकाय र ठेकेदारलाई कारबाहीको चेतावनी दिएका छन् ।
मुख्यमन्त्री सिंहका अनुसार जलाद खोला वन क्षेत्रभित्र पर्ने भएकाले त्यहाँ कुनै पनि किसिमको उत्खनन कार्य गर्नुअघि प्रारम्भिक वातावरणीय परीक्षण (IEE) अनिवार्य हुन्छ । यस्ता परीक्षण प्रतिवेदनलाई प्रदेश सरकारअन्तर्गतको वन तथा वातावरण मन्त्रालयबाट स्वीकृति लिनुपर्ने कानुनी व्यवस्था छ ।
तर, मिथिला नगरपालिकाले आफैं वातावरणीय परीक्षण स्वीकृत गरेको पाइएपछि सरकारले सो कार्यलाई विधि विपरीत र गैरकानुनी ठहर गरेको छ ।
मुख्यमन्त्री सिंहले खोलामा ठेक्का प्रक्रिया अघि बढाउने क्रममा अनुमति र प्रक्रियाको पालना नगरी उत्खनन सुरु गरिएको पुष्टि भएपछि सम्बन्धित ठेकेदारलाई आवश्यक कागजातसहित मुख्यमन्त्री तथा मन्त्रिपरिषद् कार्यालयमा उपस्थित हुन निर्देशन दिएका छन् । साथै, अनुगमनका क्रममा स्थानीय जनप्रतिनिधिहरू, प्रहरी प्रशासन र वन कार्यालयका प्रतिनिधिहरू समेत सहभागी थिए । मुख्यमन्त्री सिंहले भने, “सरकार वातावरण संरक्षण र प्राकृतिक स्रोतहरूको दिगो व्यवस्थापनप्रति प्रतिबद्ध छ ।
कानून विपरीत गतिविधिमा संलग्न जो–कोहीलाई कारबाहीको दायरामा ल्याइनेछ ।” उनले प्रदेशभरिका स्थानीय तहलाई पनि कानुनी प्रक्रिया पालना नगरी खोलानाला तथा वन क्षेत्रको स्रोत दोहन नगर्न चेतावनी दिएका छन् । स्थानीय बासिन्दाहरूले पनि मुख्यमन्त्रीको अनुगमनलाई स्वागत गर्दै खोलामा भइरहेको अवैध उत्खननले वातावरण र जलवायुमा गम्भीर असर पारेको भन्दै स्रोतको संरक्षणमा प्रदेश सरकारको सक्रियता प्रशंसनीय रहेको प्रतिक्रिया दिएका छन् ।
