हनुमान जयन्तीको अवसरमा वीरगञ्जमा निकालिएको शान्तिपूर्ण जुलुसमा ढुङ्गामुढा भएपछि छपकैया क्षेत्र तनावग्रस्त बनेको छ ।
शुक्रबार निकालिएकाे जुलुसको क्रममा छतबाट जुलुसमा ढुङ्गामुढा प्रहार भएपछि अवस्था तनावग्रस्त बनेको हाे । दुई समुदायबीच विवाद बढ्दै गएकाले स्थिति नियन्त्रणमा लिन प्रहरीले बल प्रयोग गर्नु परेको थियाे । प्रहरीले अवस्था नियन्त्रणमा लिन अश्रुग्यास प्रहार गर्दै भिड तितरबितर बनाएको थियो ।
स्थानीय बासिन्दा र प्रत्यक्षदर्शीका अनुसार, धार्मिक जुलुस निस्कँदै गर्दा केही व्यक्तिहरूले ढुङ्गामुढा गरेपछि स्थिति बिग्रिएको हो । त्यसपछि दुई पक्षबीच चर्काचर्की र झडप सुरु भएकाे थियो । झडपका क्रममा ढुङ्गामुढा भएको थियो भने केही व्यक्तिहरूले पसलहरूमा तोडफोड गरेका छन् ।
झडपका क्रममा छपकैया क्षेत्रमा रहेका केही सटर र घरहरूमा क्षति पुगेको छ भने केही मोटरसाइकलमा आगजनीसमेत भएको प्रहरीले जनाएको छ । स्थानीयका अनुसार, केही व्यक्तिहरूले जुलुस लक्षित गरी योजना बनाएर उक्साएर घटना भएको हाे । घटनामा संलग्न भएको आशङ्कामा केहीलाई नियन्त्रणमा लिइएको प्रहरीले जनाएको छ ।
घटनास्थलमा सशस्त्र प्रहरी र नेपाल प्रहरीको थप टोली परिचालन गरिएको छ । जिल्ला प्रशासन कार्यालयले सर्वसाधारणलाई अफवाहमा नपर्न र शान्ति सुरक्षामा सहयोग गर्न आग्रह गरेको छ । प्रहरीले हाल स्थिति नियन्त्रणमा रहेको जनाएको छ ।
झडपका क्रममा सामान्य घाइते भएका केही व्यक्तिहरूको वीरगञ्जस्थित नारायणी अस्पतालमा उपचार भइरहेको छ । भने घटनापछि छपकैया आसपासका क्षेत्रमा भिडभाड नगर्न प्रहरीले आग्रह गरेको छ ।
