वीरगन्ज | वीरगन्ज महानगरपालिका वडा नम्बर २१ मा भूमिहिन दलित, सुकुम्बासी र अव्यवस्थित बसोबासीका लागि गठित वडा स्तरीय सहजीकरण समितिको बैठक शुक्रबार सम्पन्न भएको छ ।
बैठकमा भूमि समस्या समाधान आयोग पर्साका अध्यक्ष तबरेज अहमदले जग्गा वितरणसम्बन्धी कानुनी प्रक्रिया र आयोगको कार्ययोजनाबारे सहभागीहरूलाई विस्तृत जानकारी गराएका थिए ।
बैठकमा सहभागी समितिका पदाधिकारी तथा सदस्यहरूले जग्गा वितरण प्रक्रियालाई पारदर्शी, निष्पक्ष र तीव्र बनाउने प्रतिबद्धता जनाएका छन् । साथै, दीर्घकालीन समाधानका उपायहरू पहिचान गर्दै सरकार तथा सरोकारवाला निकायसँग समन्वय गरेर अघि बढ्ने निर्णय गरिएको छ ।
बैठकले सहजीकरण समितिका क्रियाकलापहरूलाई अझ प्रभावकारी बनाउँदै सुकुम्बासी तथा भूमिहिन समुदायका अधिकार सुनिश्चित गर्न निरन्तर प्रयास गर्ने निष्कर्ष निकालेको छ ।
वडाध्यक्ष राधाकृष्ण रौनियारको अध्यक्षतामा सम्पन्न बैठकमा विभिन्न राजनीतिक दलका प्रतिनिधि, भूमि समस्या समाधान आयोगकी सर्वेक्षक मिना चौधरी, अमिन सुराज साह लगायतको उपस्थिति रहेको थियो ।
