सप्तरी । जनता समाजवादी पार्टी (जसपा) नेपालकी केन्द्रीय नेतृ डा. बबीसिंह यादवले पेस्तोल पड्काउँदै नाचेको भिडियोबारे गम्भीर ध्यानाकर्षण भएको बताउँदै स्पष्टीकरण दिएकी छन् । उनले सामाजिक सञ्जालमा भाइरल भएको भिडियोमा देखिएको पेस्तोल 'रेन्जर टोइ' नामक खेलौना भएको दाबी गरेकी हुन् ।
बुधबार रातिदेखि सामाजिक सञ्जालमा भाइरल भएको उक्त भिडियोमा नेतृ यादव हातमा पेस्तोल लिएर नाचिरहेको देखिन्छ । भिडियोमा उनीसँगै अन्य केही व्यक्ति पनि नाचिरहेका छन् । घटनाबारे सप्तरी प्रहरीले अनुसन्धान सुरु गरिसकेको छ भने यादवसँग सोधपुछका लागि बोलाइएको सप्तरीका एसपी ढकेन्द्र खतिवडाले जानकारी दिए ।
नेतृ यादवले बिहीबार विज्ञप्ति जारी गर्दै उक्त घटना भारतको सीमावर्ती सहर सीतामढीस्थित मामाकी छोरीको वैवाहिक समारोहमा भएको बताएकी छन् । उनले आफ्ना भाइबहिनीहरूको आग्रहमा आँगनमा रमाइलो गर्दै खेलौनाको फायर प्रयोग गरिएको घटनालाई अतिरञ्जित नगर्न आग्रह गरेकी छन् ।
उनले वैवाहिक समारोहमा रमाइलो गर्ने हक सबैलाई हुने उल्लेख गर्दै उक्त गतिविधि नियतवश नभएको बताएकी छन् । नेतृ यादव सप्तरीको बोदे बरसाइन नगरपालिका–५ निवासी हुन् । उनी जसपा नेपालकी उपाध्यक्ष तथा राष्ट्रियसभा सदस्य मृगेन्द्र सिंह यादवकी छोरी हुन् ।
