सुनसरी । सशस्त्र प्रहरी बलले सुनसरीबाट ७ सय ८३ किलो गाँजासहित दुई जनालाई नियन्त्रणमा लिएको छ । सशस्त्र प्रहरी बलको १ नम्बर बराह बाहिनी मुख्यालय सुनसरी र सुरक्षा बेस धरानको संयुक्त टोलीले बुधबार उक्त गाँजा बोकेको ट्रक र त्यसका चालक तथा सहचालकलाई नियन्त्रणमा लिएको हो ।
धरान उपमहानगरपालिका–१३ निशाने डाँडास्थित कोशी लोकमार्गमा भेडेटारबाट धरानतर्फ आउँदै गरेको नम्बर प्लेट नभएको ट्रकलाई शंका लागि जाँच गर्दा सो परिणामको गाँजा फेला परेको सशस्त्र प्रहरी बलले जनाएको छ । ट्रकको तलाशी गर्दा ना ७ ख २८१ नम्बर प्लेटसमेत फेला परेको थियो ।
सशस्त्र प्रहरीले ट्रक चालक सुनसरीका ३१ वर्षीय मनोज परियार र सहचालक धनकुटाका १८ वर्षीय आकाश राईलाई नियन्त्रणमा लिएको छ ।
गाँजा र ट्रकसहित पक्राउ परेकाहरुलाई आवश्यक कारबाहीका लागि जिल्ला प्रहरी कार्यालय सुनसरीमा बुझाइएको सशस्त्र प्रहरी बलका सहप्रवक्ता डिएसपी शैलेन्द्र थापाले जानकारी दिए ।
