सिरहा जिल्लामा प्रहरीले लागुऔषध विरुद्ध सञ्चालन गरेको अभियान अन्तर्गत तीन फरक घटनामा सात जनालाई खैरो हेरोइन, धारिलो हतियार र लागुऔषध सेवन उपकरणसहित पक्राउ गरेको छ ।
जिल्ला प्रहरी कार्यालय सिरहाका अनुसार पहिलो कारबाही जेठ २७ गते राति गोलबजार नगरपालिका–४ स्थित क्याम्पस चोकमा गरिएको थियो। शंकास्पद रूपमा हिँडडुल गरिरहेका अर्नमा गाउँपालिका–२ का २० वर्षीय राकेश कुमार महतोको शरीर खानतलासी गर्दा ४४० मिलिग्राम खैरो हेरोइन बरामद भएपछि उनलाई नियन्त्रणमा लिइएको हो ।
दोस्रो घटना जेठ २८ गते साँझ सोही स्थानमा भएको थियो। क्याम्पस चोकस्थित एक डेराबाट गोप्य सूचनाका आधारमा प्रहरीले छापा मार्दा तीन जना पक्राउ परेका हुन् । पक्राउ पर्नेमा अर्नमा गाउँपालिका–३ का २० वर्षीय अभिषेक कुमार महतो, धनगढीमाई नगरपालिका–८ का २२ वर्षीय सन्तोष कुमार महतो र औरही गाउँपालिका–१ का १८ वर्षीय प्रदीप कुमार यादव रहेका छन्। उनीहरूको कोठाबाट ०.९७० मिलिग्राम खैरो हेरोइन, एक थान धारिलो चक्कु र गाँजा सेवनमा प्रयोग हुने वाटर गन बरामद गरिएको प्रहरीले जनाएको छ ।
तेस्रो कारबाही पनि जेठ २८ गते दिउँसो गोलबजार नगरपालिका–५ मा भएको थियो। लागुऔषध कारोबार भइरहेको भन्ने सूचनाका आधारमा खटिएको संयुक्त प्रहरी टोलीले २४ वर्षीय बिमल कुमार महतो, २२ वर्षीय बिपेन कुमार साह र एक नाबालिगलाई पक्राउ गरेको हो। बिपेनको साथबाट १ ग्राम ८६० मिलिग्राम खैरो हेरोइन फेला परेको छ । बयानका क्रममा बिपेन र नाबालिगले उक्त हेरोइन बिमलबाट खरिद गरेको बताएपछि बिमलको घर खानतलासी गर्दा थप ४०० मिलिग्राम हेरोइन बरामद भएको हो ।
पक्राउ परेकाहरूमाथि इलाका प्रहरी कार्यालय गोलबजारबाट थप अनुसन्धान जारी रहेको जिल्ला प्रहरी कार्यालय सिरहाका सूचना अधिकारी तथा प्रहरी नायब उपरीक्षक बिरेन्द्र कुमार पासवानले जानकारी दिए ।
