पर्साकाे जगरनाथपुर गाउँपालिका वडा नं. ५ स्थित चिल्झपट्टीमा लामो समयदेखि अल्झिएको सडक समस्या अन्ततः समाधान भएको छ ।
गाउँपालिका अध्यक्ष श्रीकान्त यादवको पहलमा विवाद समाधान गर्दै सो क्षेत्रमा १२ फिट चौडाइको नयाँ सडक निर्माण कार्य सुरु हुने भएको छ । विगत केही वर्षदेखि स्थानीयबीचको भूमि उपयोग, नापजाँच र सार्वजनिक उपयोगका विषयमा विवाद हुँदा सडक विस्तारको कार्य रोकिएको थियो । यद्यपि, पछिल्लो समय गाउँपालिकाले स्थलगत निरीक्षण, सरोकारवाला निकाय र स्थानीयबासीसँगको पटक–पटक संवाद तथा सहमतिको प्रक्रियालाई अघि बढाउँदै अन्ततः समस्या समाधान भएको हो ।
गाउँपालिका अध्यक्ष श्रीकान्त यादवले यो उपलब्धिलाई समृद्ध जगरनाथको आधारशीला भन्दै सबैलाई धन्यवाद दिएका छन् । उनले "विकासका काममा जहाँ समस्या आउँछ, त्यहाँ संवाद र सहकार्यबाट समाधान गर्नुपर्छ आज हामीले चिल्झपट्टीको यो सडक न केवल यातायातका लागि महत्वपूर्ण छ, यो हाम्रो गाउँको विकास यात्राको एउटा नयाँ अध्याय पनी हो । यसमा साथ, समर्थन र धैर्यता देखाउनु भएका सम्पूर्ण वडावासी, जनप्रतिनिधि, प्राविधिक टोलि र सुरक्षाकर्मी धन्यवादका पात्र हुन् ।"
अध्यक्ष यादवले आगामी दिनमा पनि गाउँपालिकाभित्र रहेका अन्य अधुरा तथा विवादित योजना तथा संरचनामा समाधान खोज्दै विकासका कामलाई तीव्रता दिने प्रतिबद्धता जनाएका छन् ।
सडक निर्माण प्रारम्भ हुने खबरले स्थानीय उत्साहित भएका छन् । चिल्झपट्टीका एक स्थानीय रामवृक्ष साहका अनुसार, "सडक नहुँदा वर्षामा हिलो र घाममा धुलो खेप्नुपरेको थियो । अब विकासको बाटो खुल्ने आशा जागेको छ।"
सडक निर्माणको जिम्मा लिइएको निर्माण कम्पनीले प्रारम्भिक तयारी पूरा गरिसकेको र निर्धारित मापदण्ड अनुसार गुणस्तरीय सडक निर्माण गरिने जनाइएको छ ।
यो सडक निर्माणले वडा नं. ५ लाई अन्य वडासँग जोड्नुका साथै स्थानीय कृषि, व्यापार र जनजीवनमा फाइदा पुग्ने अपेक्षा गरिएको छ ।
भिडियाे सामाग्री
