वीरगंज महानगरपालिका–२० अपौनीस्थित सरकारी धर्मशाला विगत तीन वर्षदेखि बन्द अवस्थामा रहेको छ । धर्मशाला ठेकेदारको नियन्त्रणमा रहेको र सञ्चालनमा ल्याउन वडा कार्यालयले कुनै ठोस पहल नगरेको भन्दै स्थानीयवासीले गुनासो गरेका छन् ।
सार्वजनिक प्रयोजनका लागि निर्माण गरिएको धर्मशाला लामो समयदेखि बन्द रहँदा स्थानीयवासी विभिन्न कार्यक्रम तथा बैठक आयोजना गर्न समस्यामा परेको बताउँछन् । सार्वजनिक सम्पत्ति प्रयोगविहीन अवस्थामा रहँदासमेत सम्बन्धित निकायले चासो नदेखाएको उनीहरूको आरोप छ ।
स्थानीयवासीका अनुसार यस अवधिमा वडामा तीन जना वडा अध्यक्ष परिवर्तन भइसकेका छन्। तर, नेतृत्व परिवर्तन भए पनि धर्मशाला सञ्चालनमा ल्याउने विषयमा ठोस प्रगति हुन सकेको छैन । वडा कार्यालयको उदासीनताका कारण सार्वजनिक संरचनाको उचित व्यवस्थापन हुन नसकेको उनीहरूको गुनासो छ ।
अपौनीमा सरकारी धर्मशाला बन्द रहेको विषयसँगै स्थानीय रामजानकी मन्दिरको व्यवस्थापनबारे पनि प्रश्न उठिरहेको छ । स्थानीयवासीका अनुसार मन्दिर एक परिवारको नियन्त्रणमा रहेको छ । सार्वजनिक तथा धार्मिक महत्त्व बोकेका संरचनाको संरक्षण र व्यवस्थापनमा सम्बन्धित निकायले गम्भीर ध्यान दिनुपर्ने उनीहरूको माग छ ।
देशमा नयाँ राजनीतिक शक्ति र नेतृत्वको उदय भइरहे पनि अपौनीवासी भने आफ्नै वडामा सार्वजनिक संरचनाको उचित व्यवस्थापन र आधारभूत सुधारको प्रतीक्षामा छन् । सार्वजनिक सम्पत्तिको संरक्षण तथा सदुपयोग गर्न नसक्ने नेतृत्वबाट विकासको अपेक्षा कसरी गर्ने भन्ने प्रश्नसमेत स्थानीयले उठाउन थालेका छन् ।
स्थानीय बुद्धिजीवीहरूका अनुसार सार्वजनिक सम्पत्तिलाई व्यक्तिको नियन्त्रणमा सीमित नराखी स्थानीयको हितमा सञ्चालन गर्न सम्बन्धित निकायले तत्काल पहल गर्नुपर्छ । वडाको समग्र विकासका लागि जिम्मेवार र सुधारमुखी नेतृत्व आवश्यक रहेको उनीहरूको भनाइ छ ।
तीन वर्षदेखि बन्द रहेको सरकारी धर्मशाला कहिले सञ्चालनमा आउँछ ? रामजानकी मन्दिरको व्यवस्थापनबारे उठेका प्रश्नमा सम्बन्धित निकायले कहिले ध्यान दिन्छ? सार्वजनिक सम्पत्तिको संरक्षण र सदुपयोग गर्ने जिम्मेवारी पाएको वडा कार्यालयले अब के कदम चाल्छ ? यी प्रश्नको जवाफ अपौनीवासीले खोजिरहेका छन् ।
