सत्तारूढ दल नेपाली कांग्रेसले अबदेखि केन्द्रीय समिति बैठकको प्रत्यक्ष प्रसारण गर्ने निर्णय गरेको छ । सोमबार सानेपास्थित पार्टी केन्द्रीय कार्यालयमा बसेको केन्द्रीय समितिको बैठकमा सभापति शेरबहादुर देउवाले आगामी बैठकहरू प्रत्यक्ष रूपमा प्रसारण गरिने घोषणा गरेका हुन् ।
सभापति देउवाले बैठकमा सहभागी नेताहरूको प्रश्नको जवाफ दिँदै भने, “यसको प्रत्यक्ष प्रसारण गर्न पाएको भए राम्रो हुने रहेछ। यहाँ भएका सबै कुराहरू बाहिर गएर नेताहरू बोलिहाल्ने रहेछन् । अबदेखि प्रत्यक्ष प्रसारणको समझदारी लागू गर्ने हो ।”
उनका अनुसार केन्द्रीय समितिमा उठाइएका विषयहरू अन्ततः सञ्चारकर्मीहरूसमक्ष पुग्ने भएकाले बैठकहरूमा मिडियालाई प्रवेश दिने वा नदिने भन्ने कुराको कुनै अर्थ नहुने भएको बताए ।
“सबै साथीहरूलाई बोल्ने इच्छा छ, राम्रो बोल्छन् सबै। सबैलाई लाइभमै बोल्ने इच्छा पनि छ,” सभापति देउवाले भने । उनले मिडियामा आफ्ना भनाइ पुर्याउने चाहना नेताहरूमा रहेको उल्लेख गर्दै प्रत्यक्ष प्रसारणलाई नियमित गर्ने स्पष्ट पारे ।
यो निर्णयले नेपाली कांग्रेसको आन्तरिक लोकतान्त्रिक अभ्यासलाई पारदर्शी र उत्तरदायी बनाउने अपेक्षा गरिएको छ ।
