जनकपुरधाम । मधेस प्रदेश सरकारले जेनजी आन्दोलनमा सहादत प्राप्त गरेका, प्रदेशमा स्थायी बसोबास रहेका सहिद परिवारलाई राहतस्वरूप प्रति परिवार रु दुई लाख ५० हजार प्रदान गर्ने निर्णय गरेको छ ।
मधेस प्रदेशका मुख्यमन्त्री सतिशकुमार सिंहका अनुसार मन्त्रिपरिषद्को शुक्रबार बसेको बैठकले सुशासन र भ्रष्टाचार नियन्त्रणको मागसहित भएको जेनजी आन्दोलनका क्रममा सहादत प्राप्त गरेका सहिदहरूप्रति भावपूर्ण श्रद्धाञ्जली अर्पण गर्ने घोषणा गरेको छ ।
बैठकले आन्दोलनका क्रममा घाइते भएकाहरूको शीघ्र स्वास्थ्यलाभको कामना गर्दै प्रभावकारी उपचार व्यवस्था मिलाउनुपर्ने निर्णय पनि गरेको छ ।
त्यसैगरी, मन्त्रिपरिषद् बैठकले जेनजीको शान्तिपूर्ण आन्दोलनमा घुसपैठ गरी सरकारी तथा निजी सम्पत्तिमा भएको आगजनी, तोडफोड र क्षतिको घटनामा संलग्न व्यक्तिको पहिचान गरी कानुनी कारबाही अघि बढाउनुपर्ने र आन्दोलनसँग सम्बन्धित मागको समाधान वर्तमान संविधानको दायराभित्रै खोजिनुपर्ने निर्णय गरेको छ ।
