सरकारले आज (सोमबार) देखि सार्वजनिक सवारी साधनमा रुट परमिट खुला गरेको छ । देशभरका यात्रुलाई चाडपर्वको समयमा सहज र व्यवस्थित रूपमा गन्तव्यस्थलसम्म पुग्न सकिने गरी असोज ६ गतेदेखि असोज २२ गतेसम्म रुट परमिट खुला गरिएको हो ।
यातायात व्यवस्था विभागका अनुसार गत मंगलबार बसेको सरोकारवालाको बैठकले चाडपर्व अवधिका लागि यस्तो व्यवस्था गर्ने निर्णय गरेको हो । रुट परमिट खुला भएपछि तोकिएको मार्ग नलिई पनि सार्वजनिक सवारी साधनले गन्तव्यसम्म सेवा दिन पाउने व्यवस्था मिलाइएको विभागले जनाएको छ ।
यस्तै, सरकारले चाडपर्वमा यातायात सहज बनाउन खाद्यान्न लगायतका अत्यावश्यक सामग्री ढुवानी गर्नेबाहेकका ट्रेलरलगायत ठूला सवारी साधनलाई असोज ६ गतेदेखि पूर्णिमासम्म नारायणघाट–काठमाडौँ खण्डमा सञ्चालनमा रोक लगाउने निर्णय गरेको छ ।
