काठमाडौं । आईसीसी टी–२० विश्वकप एशिया–प्यासिफिक छनोटमा नेपालले लगातार दोस्रो जित निकाल्दै सुपर सिक्स खेल्ने अवसर पाएको छ ।
शुक्रबार भएको समूह बी को अन्तिम खेलमा नेपालले जापानलाई ५ विकेटले पराजित गर्दै समूह विजेताका रूपमा सुपर सिक्समा प्रवेश गरेको हो । जापान भने अंक विहिन रुपमा सुपर सिक्स खेल्नेछ। नेपालले सुपर सिक्समा २ अंक प्राप्त गरेको छ ।
नेपाल र जापान दुबै टोलीले कुवेतलाई पराजित गरेपनि कुवेत समूह चरणबाटै बाहिरिएकाले त्यसबाट प्राप्त अंक सुपर सिक्समा जोडिने छैन । यस जितसँगै नेपाल समूह बी को विजेता र जापान उपविजेता बनेका छन् ।
सुपर सिक्समा नेपालले जापानबाहेक समूह ए र समूह सी बाट आएका चार टोलीसँग प्रतिस्पर्धा गर्नेछ । समूह ए बाट संयुक्त अरब एमिरेन्ट्स (युएई) र कतार सुपर सिक्समा प्रवेश गरिसकेका छन् भने समूह सी बाट सुपर सिक्समा प्रवेश गर्ने टोलीको निर्णय बाँकी छ । सुपर सिक्सको शीर्ष तीनमा रहने टोलीले अर्को वर्ष भारत र श्रीलङ्कामा हुने टी–२० विश्वकप खेल्नेछ ।
खेल विवरण:
जापानले दिएको १३२ रनको लक्ष्य नेपालले १८ ओभरमा ५ विकेटको क्षतिमा पूरा गर्यो ।
नेपालका लागि ओपनर कुशल भुर्तेल र आशिफ शेखले ५ ओभरमा ३६ रनको साझेदारी गर्दै उत्कृष्ट सुरुवात दिलाए । कुशल भुर्तेल २१ बलमा ३ चौकासहित २१ रनमा क्याच आउट भए भने आशिफ शेख २१ बलमा १ चौका र ४ छक्का प्रहार गरी ३८ रनमा क्याच आउट भए ।
कप्तान रोहित पौडेल १८ रनमा एलबीडब्लु भए। सन्दीप जोरा ५ रनमा क्याच आउट भए भने कुशल मल्ल ४ रनमा कट एण्ड बोल्ड भइसके ।
गुल्सन झा २८ र दिपेन्द्र सिंह ऐरि १४ रनमा अविजित रहे। छैटौँ विकेटका लागि उनीहरूले ४२ रनको अविजित साझेदारी गर्दै नेपाललाई सहज जित दिलाए । गुल्सन झाले २० बलमा १ चौका र २ छक्का प्रहार गरे भने दिपेन्द्र १४ बलमा १ चौकासहित १४ रनमा नटआउट रहे ।
जापानका लागि कप्तान केन्डेल काडोवाकी फ्लेमिङले सर्वाधिक ६० रनको योगदान दिए। उनले ४६ बलमा ५ चौका र ३ छक्का प्रहार गरे। इसाम रहमानले ३१ रन बनाए ।
नेपालका लागि गुल्सन झा र सन्दीप लामिछानेले समान २–२ विकेट लिए । सोमपाल कामी र नन्दन यादवले समान १–१ विकेट झारे ।
