जनकपुरधाम । मधेश प्रदेशका मुख्यमन्त्री जितेन्द्र सोनलले जनकपुर उद्योग वाणिज्य सङ्घका अध्यक्ष सुरेन्द्र भण्डारीमाथि भएको कुटपिट प्रकरणको निष्पक्ष छानबिन गरी दोषीमाथि कडा कारबाही गर्न प्रहरी प्रशासनलाई निर्देशन दिएका छन् ।
मुख्यमन्त्री सोनलले शनिबार अस्पताल पुगेर घाइते भण्डारीको भेट गर्दै स्वास्थ्य अवस्थाबारे जानकारी लिएका थिए । सो क्रममा उनले मधेश प्रदेश प्रहरी प्रमुखलाई फोनमार्फत तत्काल छानबिन गरी घटनामा संलग्न प्रहरीमाथि आवश्यक कानूनी कारबाही गर्न निर्देशन दिएका हुन् ।
शुक्रबार राति जनकपुरधामको सोनारपट्टी क्षेत्रमा प्रहरी र स्थानीय सुनचाँदी व्यवसायीबीच झडप भएको थियो । जिल्ला प्रहरी कार्यालय धनुषाबाट गएको टोलीले एक सुनचाँदी पसलमा छापा मार्ने क्रममा विवाद उत्पन्न भएको बताइएको छ ।
त्यस क्रममा प्रहरीले हस्तक्षेप गर्न खोज्दा व्यवसायीहरूले विरोध जनाएपछि धकेलाधकेल भएको र सोही क्रममा उद्योग वाणिज्य सङ्घका अध्यक्ष सुरेन्द्र भण्डारी घाइते भएका थिए ।
व्यवसायीहरूले दीपावलीको समयमा राति राति पसलमा छापा मार्ने प्रहरीको कार्यप्रति आपत्ति जनाउँदै विरोध प्रदर्शन गरेका थिए । घटनापछि व्यवसायी समुदायले प्रहरी प्रशासनको कार्यशैलीप्रति असन्तोष व्यक्त गर्दै निष्पक्ष छानबिन र दोषीमाथि कारबाहीको माग गरेका छन् ।
