सप्तरी | सप्तरीका क्रिकेट खेलाडीहरूले अभ्यासका लागि आवश्यक नेट पिचको अभावमा स्वयं श्रमदान गर्दै पिच निर्माणमा जुटेका छन् ।
राजविराजस्थित पविमाबिको क्रिकेट मैदानको दक्षिणतर्फ रहेको खाली स्थानमा स्थानीय खेलाडीहरूले श्रमदानका साथ पिच निर्माण सुरु गरेका हुन् । क्रिकेट खेलाडी सुशान्त देवका अनुसार, “अहिले सप्तरीमा क्रिकेटको महत्व बढेको छ, तर खेलाडीहरूले नियमित अभ्यास गर्न पिच नभएपछि हामी स्वयं पिच निर्माणमा जुटेका हौँ ।”
राजविराजस्थित पविमाबि क्रिकेट मैदानमा प्रतियोगिताहरू सञ्चालन हुँदै आए पनि नेट पिच नहुँदा खेलाडीहरूले नियमित अभ्यासमा कठिनाइ भोग्नुपरेको उनले बताए ।
सप्तरीका राष्ट्रिय खेलाडी अमित यादवले भने, “पिचको अभावले जिल्लाका खेलाडीहरूले नियमित अभ्यास गर्न सकिरहेका छैनन् । यो अवस्थामा पनि खेलाडीहरू स्वयं पिच निर्माणमा जुट्नु सकारात्मक कुरा हो। तर सम्बन्धित निकाय र सरकारको सहयोग आवश्यक छ ।”
पूर्व राष्ट्रिय खेलाडी पवन दासले भने, “अभ्यासका लागि उपयुक्त पूर्वाधार अत्यावश्यक छ। पूर्वाधार निर्माणका लागि आवश्यक सामग्री उपलब्ध गराउन सम्बन्धित निकायले ध्यान दिनुपर्छ ।”
सप्तरी क्रिकेट संघ र केही खेलप्रेमीहरूको सहयोग रहे पनि इट्टा, बालु, सिमेन्ट र श्रमिक खर्च अभावको कारण पिच निर्माणमा चुनौती आइरहेको क्रिकेट खेलाडी अमित यादवले जानकारी दिए ।
सप्तरी क्रिकेट संघका सचिव चन्दनकुमार यादवले जानकारी दिनुभयो कि पविमाबि मैदानलाई राष्ट्रिय स्तरको सुविधा सम्पन्न बनाउन संघको पहलमा मधेश प्रदेश सरकारले साइड स्किन, टर्फ पिच, खेलाडी पेभिलियन लगायतका पूर्वाधार निर्माण कार्य पूरा गरिसकेको छ । तर अभ्यासका लागि नेट पिच नहुँदा खेलाडीहरूले समस्या भोग्नु परेको छ ।
