वीरगंजमा सिटीनेट नेपाल नेशनल च्याप्टर (सीएनएनसी) को राष्ट्रिय बैठक बिहीबार भव्य रुपमा सम्पन्न भएको छ ।
देशभरका ६ वटै महानगरपालिका, उपमहानगर र नगरपालिकाका प्रमुख तथा उपप्रमुखहरूको सहभागिता रहेको बैठकको मुख्य आयोजक वीरगंज महानगरपालिका थियो । बैठकमा शहरी विकास, प्रदूषण नियन्त्रण, विपद् जोखिम न्यूनीकरण, दिगो विकास रणनीति तथा नगर–नगरबीच समन्वयका विषयमा विस्तृत छलफल गरिएको थियो । सहभागी नगरपालिकाहरूले आगामी वर्षका कार्यक्रम, सहकार्यका ढाँचा र सिटीनेटको भूमिका मजबुत बनाउन आवश्यक मार्गचित्र प्रस्तुत गरेका थिए ।
विपद् जोखिम न्यूनीकरण तथा अनुसन्धान केन्द्र स्थापनाको सैद्धान्तिक सहमति
बैठकले नेपालका प्रमुख शहरहरूलाई दिगो र उत्थानशील बनाउन ‘विपद् जोखिम न्यूनीकरण, अनुसन्धान तथा शिक्षण केन्द्र’ स्थापना गर्ने सैद्धान्तिक सहमति जनाएको छ । यो केन्द्रले स्थानीय तहलाई प्राविधिक क्षमता, विपद् पूर्वतयारी र प्रतिकारण योजनामा सहयोग गर्ने अपेक्षा छ ।
वीरगंज महानगरमा विपद् सम्बन्धी कोष गठन
बैठकमा वीरगंज महानगरपालिकाको समन्वयमा ‘विपद् सम्बन्धी कोष’ स्थापना गर्ने निर्णय भएको छ ।
त्यस्तै, नगरपालिकाहरूको समूह दर्ता गर्ने, सचिवालय गठन, फोकल पर्सन तोक्ने, हरेक ६ महिनामा बैठक बस्ने र विविध कार्ययोजना तयार पार्ने निर्णय गरियो । आगामी बैठक जेठ महिनामा ललितपुरको गोदावरी नगरपालिकामा हुने उल्लेख गरिएको छ । मेयर राजेशमान सिंहले सिटीनेटमार्फत भएका अनुभव आदानप्रदानले आफ्नो नगरपालिकामा विकास योजना बनाउन तथा कार्यान्वयनमा महत्वपूर्ण सहयोग पुगेको बताएका थिए ।
सहभागी नगरपालिकाबीच अनुभव आदानप्रदान
बैठकमा पछिल्लो एक वर्षमा विपद् व्यवस्थापन, दिगो विकास तथा उत्थानशील सहर निर्माणसम्बन्धी गतिविधिबारे विभिन्न नगरपालिकाले अनुभव आदानप्रदान गरेका थिए ।
प्राध्यापक आममोदनी दीक्षित र डा. गणेश कुमार जिसीले सिटीनेटको अवधारणा, आवश्यकता तथा कार्य–सञ्चालनको व्यावहारिक पक्षबारे प्रस्तुति दिएका थिए । सिटीनेट नेपालका राष्ट्रिय अध्यक्ष तथा विराटनगरका मेयर नागेश कोइराला र वीरगंजका मेयर राजेशमान सिंहले गमलामा पानी हालेर बैठक उद्घाटन गरेका थिए । कार्यक्रमको प्रारम्भमा काठमाडौं महानगरका मेयर बालेन्द्र साहका स्वर्गीय बुवाप्रति एक मिनेट मौनधारण गर्दै श्रद्धाञ्जलि अर्पण गरिएको थियो ।
कार्यक्रममा वीरगंज महानगरका उपमेयर इम्तेयाज आलमले स्वागत मन्तव्य दिएका थिए ।
सिटीनेट : एसिया–प्रशान्त क्षेत्रको बलियो स्थानीय सरकार सञ्जाल
एसिया–प्रशान्तका १०३ सदस्यसहित सिटीनेट क्षेत्रीय स्तरमा स्थानीय सरकारलाई दिगो विकास, जलवायु परिवर्तन, शहरी प्रशासन र विपद् व्यवस्थापनमा सहकार्य गराउने प्रमुख मञ्च हो । नेपालमा सिटीनेट नेपाल राष्ट्रिय अध्यायअन्तर्गत १६ वटा पालिकाहरू आवद्ध छन्, जसमा वीरगन्ज, विराटनगर, भरतपुर, पोखरा, ललितपुर लगायतका महानगरपालिका समावेश छन् ।
नेपालमा सिटीनेटको यात्रा
सिटीनेटको पहिलो कार्यक्रम नेपालमा २०८० सालमा धनगढीमा भएको थियो । राष्ट्रिय च्याप्टर गठन भने २०८० भदौमा विराटनगरमा सम्पन्न गरिएको थियो । यसअघि सिटीनेटको ४५औँ बैठक इन्डोनेसियामा सम्पन्न हुँदा नेपालको प्रतिनिधित्व ललितपुरका मेयर चिरिबाबु महर्जनले गरेका थिए । सफलतापूर्वक बैठक सम्पन्न गर्दै सहभागी नगरपालिकाहरूले सिटीनेटमार्फत थप सहकार्य, ज्ञान आदानप्रदान र समन्वयलाई बलियो बनाउने संकल्प व्यक्त गरेका छन् ।
