रौतहटमा शनिबार राति ट्याक्टरको ठक्करबाट एक जनाको मृत्यु भएको छ भने एक जना गम्भीर घाइते भएका छन् ।
मृत्यु हुनेमा गढीमाई नगरपालिका–४ सुन्दरपुरका ५० वर्षीय प्रमोद साह कानु रहेका छन् । दुर्घटना चन्द्रपुर नगरपालिका–१० स्थित चन्द्रपुर–गौर सडकखण्डअन्तर्गत गरुडाबाट बालचनपुरतर्फ आउँदै गरेको समयमा भएको थियो । त्यहाँ विपरीत दिशाबाट आउँदै गरेको नम्बर नखुलेको ट्याक्टरले प्रदेश २–०३–०१३ प ३०६२ नम्बरको मोटरसाइकललाई ठक्कर दिएको इलाका प्रहरी कार्यालय चन्द्रनिगाहपुरले जनाएको छ ।
ठक्करबाट मोटरसाइकल चालक प्रमोद साह कानु गम्भीर घाइते भएका थिए । उनलाई उपचारका लागि चन्द्रनिगाहपुरस्थित सरकारी अस्पताल लगिएको थियो जहाँ चिकित्सकले उनलाई मृत घोषित गरेका थिए ।
मोटरसाइकलको पछाडि सवार सोही स्थानका ६५ वर्षीय जोगेन्द्र हजरा पासवानको टाउकोमा गम्भीर चोट लागेको छ । उनलाई प्राथमिक उपचारपछि थप उपचारका लागि राति नै वीरगन्जस्थित न्युरो अस्पतालमा रिफर गरिएको छ ।
दुर्घटनापछि ट्याक्टर चालक फरार रहेका छन्। प्रहरीले घटनास्थल र आसपासबाट शंकास्पद दुईवटा ट्याक्टर नियन्त्रणमा लिएको छ । फरार चालकको खोजी तथा घटनाबारे थप अनुसन्धान जारी रहेको छ ।
