पर्सा प्रहरीले स्रोत नखुलेको ६ लाख ७१ हजार ९ सय ५० रुपैयाँसहित तीन जना हुण्डी कारोबारीलाई पक्राउ गरेको छ ।
पर्सा प्रहरीले विशेष सूचनाका आधारमा खटिएको टोलीले विभिन्न स्थानबाट पक्राउ परेका तीनै जनालाई नियन्त्रणमा लिएर थप अनुसन्धान सुरु गरेको छ । पक्राउ पर्नेमा भारत बिहार राज्य, बेतिया जिल्ला, बैरिया थाना वडा नं. ८ मथौली घर भई हाल पर्सा, वीरगञ्ज महानगरपालिका वडा नं. २ छपकैयामा बस्ने सफी अहमदका छोरा वर्ष ५० का अनवर मिया, अनवर मियाका छोरा वर्ष २२ का महमद कैफ अहमद र भारत बिहार राज्य कै मोतिहारी जिल्ला, दरपा ग्राम पञ्चायत गम्हरियाकला वडा नं. ३ बस्ने गफुर मियाका छोरा वर्ष ४८ का फूल महमद रहेका छन् ।
उनिहरूलाई वीरगञ्ज महानगरपालिका वडा नं. १० मकालु चोकबाट पक्राउ गरिएको हो । पर्सा प्रहरीका नायब उपरीक्षक राजु कार्कीका अनुसार अनवर मियाको साथबाट भारतीय नम्बर BR 22 H 6338 मा सवार रहेको मोटरसाइकलमा उनले लुकाएकाे पाइन्टको खल्तीबाट रु. १ लाख ३० हजार ९ सय ५० रूपैयाँ बरामद गरेको छ । जसमा रु. एक हजार दरका ५२ पिस, रु. ५०० का १ सय ५७ पिस र रु. ५० का ९ पिस रहेका छन् ।
त्यसैगरी, मोटरसाइकलको पछाडिबाट महमद कैफ अहमदको पाइन्टको खल्तीबाट रु. तीन लाख बरामद भएको छ । जसमा रु. एक हजारका २०० पिस र रु. ५०० का २०० पिस रहेका छन् । त्यसैगरी फूल महमदको साथबाट लु ४१ प ६८९७ नम्बरको मोटरसाइकलमा सवार रहेको ज्याकेटको खल्तीबाट दुई लाख एकचालीस हजार रूपैयाँ बरामद गरेको छ ।
पक्राउ परेका माथि मुलुकी अपराध संहिता, २०७४ को दफा १२५ को (क) बमोजिम हुण्डी कारोबार सम्बन्धि कसुरमा पर्सा जिल्ला अदालतबाट तिनदिनकाे म्याद थप गरी अनुसन्धान शुरू गरेकाे छ ।
