वीरगन्ज–९ घण्टाघर नजिक बीपी उद्यानको उत्तरतर्फ रहेको खाली जग्गामा वीरगन्ज महानगरपालिकाले ‘रेल्वे म्युजियम’ निर्माणका लागि तयारी सुरु गरेको छ ।
गत असार ९ गते सम्पन्न महानगरपालिकाको १३औँ नगरसभामा मेयर राजेशमान सिंहले चालू आर्थिक वर्ष २०८२/८३ को नीति तथा कार्यक्रममा वीरगन्ज नेपालकै पहिलो रेल सेवा (रक्सौल–अमलेखगञ्ज रेल सेवा) सुरु भएको ऐतिहासिक सहर भएको उल्लेख गर्दै, रेल सेवा स्थापना भएको १०० वर्ष पूरा भएको अवसरमा पुराना रेल्वे संरचनाको संरक्षण तथा पुनःप्रयोग गर्दै ‘रेल्वे म्युजियम’ निर्माण गरिने घोषणा गरेका थिए ।
सोही घोषणाअनुसार हाल बीपी उद्यान छेउको जग्गामा म्युजियम निर्माणको तयारी थालिएको हो । शनिबार त्यहाँ रहेका पुराना रेल्वे संरचना, झाडी तथा रुख फाँडेर सरसफाइ गरिएको छ। म्युजियम निर्माणस्थललाई सफा र व्यवस्थित बनाउन सरसफाइ कार्यक्रम सञ्चालन गरिएको महानगरपालिकाले जनाएको छ ।
सरसफाइ कार्यक्रममा वीरगन्ज महानगरपालिका, ग्रीन सिटी प्रहरी सामुदायिक केन्द्र, सशस्त्र प्रहरी बल र नेपाली सेनाको संयुक्त सहभागिता रहेको थियो ।
कार्यक्रममा वीरगन्ज महानगरपालिकाका मेयर राजेशमान सिंह, पर्साका प्रमुख जिल्ला अधिकारी भोला दाहाल, प्रहरी उपरीक्षक सुदीपराज पाठक, ग्रीन सिटी प्रहरी सामुदायिक केन्द्रका अध्यक्ष जयप्रकाश खेतान, प्रमुख प्रशासकीय अधिकृत अरविन्दलाल कर्णलगायतको सहभागिता रहेको थियो ।
.jpg-2-1769587845.jpg)
